Петто издание на Скопскиот поетски фестивал oд 24 до 26 април

Петтото издание на Скопскиот поетски фестивал ќе се одржи во  периодот од 24 до 26 април, на неколку локации во Скопје, и тоа: во Младинскиот културен центар (кино „Фросина“ и Галеријата), во кафе-книжарницата „Буква“ и на Филолошкиот факултет „Блаже Конески“ ‒ Скопје.

Ќе гостуваат поети од пет држави, а ќе настапат и триесетина домашни поети. Од странство доаѓаат автори од Словенија, од Турција, од Грција, од Србија и од Бугарија. Мотото на годинашниот фестивал е „Од ритам до алгоритам“ („Поезијата е ритам ‒ од срцата в гради до пулсот на градот. / Јазикот е алгоритам ‒ со кодови го храни за смислата гладот“).

Со ова мото, организаторите сакаат да го одбележат јубилејот ‒ пет години Скопски поетски фестивал, но и да го поврзат со големиот јубилеј 80 години од кодификацијата на македонскиот јазик.

Официјалното отворање е закажано за 24 април, во Младинскиот културен центар, а потоа ќе се одржат неколку поетски читања, поетско-музички перформанси, промоции на книги и мастерклас/работилница за креативно пишување поезија.

Автор на постерот за ова издание на СПФ е Андреј Павлов.