Петдневен бојкот на големите трговски ланци во Србија! Ефектива: Успех е ако ги намалиме приходите за една третина

По бојкотот на големите трговски ланци што се одржа во петокот на 31 јануари во Србија, Здружението за заштита на потрошувачите Ефектива ги повика граѓаните на нов подолг бојкот. Овој, велат, ќе трае пет дена – од денеска понеделник, 10 февруари до петок, 14 февруари.

Имено, Ефектива упати нов повик до потрошувачите во кој ги повикува во следните пет дена да не пазаруваат во пет големи трговски синџири – Delhaize, во кои се „Maxi“ и „Shop&Go“, потоа Mercator, во кој се „Idea“ и „Roda“, како и „DIS“, „Lidl“ и „Univerexport“.

Како што истакнуваат од тоа здружение, успех ќе се постигне доколку приходите се намалат за една третина.

Зборувајќи за резултатите од претходниот бојкот, Дејан Гавриловиќ од Ефектива за ТВН1 изјави дека е забележан пад на приходите од 37 отсто, по што е упатен повик до трговците, добавувачите и до државата да направат нешто конкретно.

Бидејќи немало никаква реакција, а добиле информација дека дури и зголемиле цени, Гавриловиќ рече дека следел повик за петдневен бојкот.

„Ако успееме да ги намалиме приходите за една третина, тогаш би можеле да зборуваме за успех и дека може да се случи нешто конкретно. Потрошувачите известуваат дека некои трговци ги покачиле цените и дека сега, викендот пред бојкотот, продавниците пукаат од попусти на продажбата. Не сме задоволни од овие акции, сакаме трајно намалување на цената“, објаснува Гавриловиќ.