Песков не очекува брзи одлуки во односите со Вашингтон, а откри и за што „не се преговара“

Портпаролот на Кремљ, Дмитриј Песков, денеска изјави дека не очекува „лесни и брзи“ одлуки во руско-американските односи, и покрај брзото зближување во изминатите две недели поттикнато од рускиот и американскиот претседател Владимир Путин и Доналд Трамп.

„Никој не очекува решенијата да бидат лесни и брзи“, рече Песков на редовниот брифинг со новинарите.

Тој, сепак, додаде дека е многу важно Трамп да зборува во свое име и да е подготвен да ги сослуша другите.

Американски и руски дипломати денеска се среќаваат во Истанбул за да разговараат за заживување на работата на амбасадите на двете земји, на втората средба меѓу претставниците на двете сили по онаа на 18 февруари во Саудиска Арабија. Првата средба на ниво на министри за надворешни работи следуваше по телефонскиот разговор меѓу рускиот претседател Владимир Путин и американскиот претседател Доналд Трамп на 12 февруари.

„Нашите дипломати се обидуваат да се потпрат на договорот што произлезе од телефонскиот разговор меѓу двајцата претседатели и договорите склучени за време на разговорите во Ријад“, рече Песков.

Песков, исто така, рече дека руската анексија на украинските територии што ги зазеде „не е предмет на преговори“, во време кога зад сцената се прават напори да се започне со решавање на конфликтот во Украина.

Териториите кои станаа дел од Руската Федерација се запишани во Уставот и се составен дел, рече Песков.

„Тоа е апсолутно неспорно и не може да се преговара“, изјави Песков за новинарите.

Од септември 2022 година, Русија прогласи анексија на четири украински региони кои се делумно под нејзина контрола – Доњецк и Луганск на исток и Запорожје и Керсон на југ. Исто така, го анектираше украинскиот полуостров Крим во март 2014 година по кратката воена интервенција и референдумот за анексија што Киев и Западот го оценија како незаконски.