Персоналот на УСАИД низ светот оди на административен одмор

Приближно 10.000 вработени во УСАИД, или речиси сите од нив, ќе бидат ставени на административно отсуство на крајот на работната недела бидејќи претседателот Доналд Трамп има намера да ја распушти целата организација.

Во известувањето на Стејт департментот до вработените во Американската агенција за меѓународен развој (УСАИД), од кои две третини работат во странство во 60 земји ширум светот, се вели дека персоналот на „директен ангажман“ на УСАИД низ светот ќе биде ставен на административен одмор од петок, 7 февруари.

Единствен исклучок се мал број вработени одговорни за „критичните функции, клучните раководства и конкретно одредени програми“, кои ќе бидат известени до четврток навечер.

Стејт департментот работи на план за организирање и плаќање за враќање на вработените во УСАИД кои живеат во странство во САД во рок од 30 дена и за раскинување на договорите кои не се сметаат за суштински, се вели во известувањето.

Американскиот претседател Доналд Трамп на почетокот на февруари потврди дека ќе ја укине Американската агенција за меѓународен развој (УСАИД).

Функционирањето на агенцијата беше доведено во прашање откако администрацијата на Трамп објави дека размислува за спојување на УСАИД со Стејт департментот, со цел да се намали бројот на вработени во агенцијата и да се усогласат нејзините трошоци со политиката на Трамп „Америка на прво место“.

Трамп претходно изјави дека УСАИД е управувана од „куп радикални лудаци“ и дека е лошо управуван. Тој додаде дека ќе ги „исфрли лудаците“ од агенцијата пред да се донесе одлука за нејзината иднина.