Пад од 2400 милијарди долари на „Волстрит“

По објавата на Вашингтон за воведување на радикални тарифи, главните светски берзи доживеаја остар пад. Само на „Волстрит“ беа избришани околу 2,4 трилиони долари од пазарната капитализација на компаниите вклучени во индексот S&P 500.

Откако американскиот претседател Доналд Трамп огласи давачки од 10 проценти на целиот увоз, особено од државите со кои САД имаат најголем трговски дефицит, како и дополнителни реципрочни тарифи, на глобалните берзи завладеа голема загриженост.

Ова би можело да предизвика интензивирање на царинска војна, нарушувања во ланците на снабдување и меѓународната размена, зголемување на инфлацијата и успорување на економскиот раст на најголемите светски економии, а можеби дури и рецесија во некои од нив.

Азиските берзи први беа погодени вчера, откако Трамп објави драстични реципрочни давачки за увоз од Кина, Јапонија, Индија, Тајван, Јужна Кореја и други. Увозот од Кина, кој веќе подлежи на царини од 20 проценти, во иднина ќе биде оптоварен со дополнителни давачки од 34 проценти, 24 проценти за увоз од Јапонија, 26 проценти од Индија и 25 проценти од Јужна Кореја.

Како резултат на тоа, вредноста на акциите падна на сите азиски берзи вчера, со најголеми загуби во Јапонија, Јужна Кореја и Хонгконг.

Европските берзи беа следни, со индекси кои покажаа длабока негатива уште од самиот почеток на тргувањето. Ова се случи откако Трамп објави дополнителни царини од 20 проценти на увозот од Европската Унија, а многу европски лидери возвратија со остар тон и најавија контрамерки. На крајот од тргувањето, лондонскиот FTSE индекс се намали за 1,55 проценти, достигнувајќи 8.474 поени, додека франкфуртскиот DAX падна за 3,01 проценти, на 21.717 поени, а парискиот CAC за 3,31 проценти, на 7.598 поени.

Во Соединетите Американски Држави, Dow Jones се намали за 3,98 проценти, на 40.545 поени, S&P 500 падна за 4,84 проценти, на 5.396 поени, а Nasdaq потона за 5,97 проценти, на 16.550 поени. За сите три индекси, ова е најголемиот дневен пад од 2020 година, кога пазарите беа во паника поради кризата со корона вирусот. Овој пад вчера избриша приближно 2,4 трилиони долари од пазарната вредност на компаниите во индексот S&P 500. Во исто време, меѓу најголемите губитници беа акциите на многу технолошки гиганти. Цената на акциите на Apple падна за 9,2 проценти, Amazon за девет проценти, NVIDIA речиси осум проценти. Кина и Европската Унија веќе најавија реципрочни мерки.