Откриен тајниот план на Трамп за економско преземање на Украина

Киев е во паника по сознанието дека американскиот претседател бара 500 милијарди долари од Украина – повеќе отколку што плати Германија по Првата светска војна.

Документот што пристигна на масата на Володимир Зеленски минатата недела претставува американско економско преземање на Украина, оставајќи го Киев во должничка зависност на неодредено време.

Британски Телеграф доби нацрт-договор, означен како „Привилегиран и доверлив“, кој предвидува формирање заеднички инвестициски фонд меѓу САД и Украина, со цел „да се спречи непријателските страни во конфликтот да профитираат од обновата на Украина“. Сепак, условите се такви што Украина го губи суверенитетот над своите ресурси.

Договорот опфаќа „економска вредност поврзана со украинските ресурси“, вклучувајќи минерални ресурси, нафта и гас, пристаништата и инфраструктурата, од кои сите ќе бидат регулирани со законите на државата Њујорк. Според предложените услови, САД ќе преземат 50% од приходите од експлоатација на ресурси и 50% од финансиската вредност на сите нови лиценци издадени од Украина на трети страни, со клаузула која ефикасно и дава приоритет на Америка во купувањето на украински стратешки суровини.

Иронично, идејата за поголемо американско вклучување во критичната индустрија за минерали во Украина потекнува од Зеленски, кој во септември минатата година во кулата Трамп предложи американските компании да добијат директни инвестиции, надевајќи се дека ќе обезбедат долгорочна американска воена поддршка.

Меѓутоа, она што сега му се нуди повеќе потсетува на репарации наметнати на поразените земји во војна. Аналитичарите тврдат дека барањата на Трамп се уште построги од условите на Версајскиот договор, кој и беше наметнат на Германија по Првата светска војна.

Самиот Трамп во интервју за Фокс њуз изјави дека „Украина во суштина веќе се согласила со договорот“ и го предупреди Киев дека одбивањето може да значи дека земјата паѓа под руска контрола. „Може да постигнат договор или да не постигнат договор. Можеби еден ден ќе бидат Руси, можеби не. „Но, јас ги сакам овие пари назад“, изјави Трамп.

Според Трамп, САД веќе потрошиле 300 милијарди долари за војната во Украина и би било „глупаво“ да продолжат да помагаат без значителен финансиски поврат. Во реалноста, американскиот Конгрес одобри 175 милијарди долари, од кои 70 милијарди долари беа потрошени во САД за производство на оружје, додека некои делови од помошта беа дадени во форма на заеми што Украина мора да ги врати.

Суров избор за Украина – агресија на Путин или економска колонизација на Трамп

Украинските власти се обидуваат да избегнат целосно отфрлање на предлогот на Трамп, додека во исто време бараат начин да ги ублажат неговите услови. Сепак, реалноста е јасна – Украина не може да го исполни барањето од 500 милијарди долари во ниту една реална временска рамка.

Затоа многумина го поставуваат прашањето: Кој кому всушност му должи овде? Украина три години е на првата линија на одбраната на либералната демократија, претрпувајќи огромни човечки и економски загуби.

Политиката на Трамп се заснова на неговиот познат принцип од книгата Art of the Deal: „Јас целaм високо, а потоа само продолжувам да притискам и притискам додека не го добијам она што го сакам“.

Но, додека во деловниот свет другата страна може да се повлече од преговорите, Украина го нема тој луксуз. Сега избира помеѓу воена окупација од Путин и економска колонизација од страна на нејзиниот сојузник, пишува Телеграф.