Осум обвиненија за мажот кој со автомобил влета на уличен фестивал во Ванкувер

Триесетгодишниот маж, кој во саботата со автомобил влета на уличен фестивал на филипинската заедница во Ванкувер, Канада, при што загинаа 11 лица, а десетици се повредени, доби осум обвиненија за убиство од втор степен

Тој ѝ бил познат на полицијата и пред нападот, како човек со историја на проблеми со менталното здравје, па отфрлена е можноста мотивот да бил екстремизам.

Организаторите на годишниот фестивал „Лапу Лапу“ соопштија дека филипинската заедница во Ванкувер е во жалост и дека ефектите од нападот ќе се чувствуваат со години.

Полицијата соопшти дека жртвите се на возраст од 5 до 65 години.

Фестивалот во Ванкувер, град со повеќе од 140.000 Филипинци, се одржува секоја година во чест на Лапу-Лапу, национален херој кој се спротивставил на шпанската колонизација во 16 век. Полицијата извршила процена на безбедносната закана пред фестивалот и делумно го затворила патот зад училиштето каде што се случувале поголемиот број од настаните.