Oрбан ја повика ЕУ да започне директни преговори со Русија за Украина

Орбан ја повика ЕУ да започне директни преговори со Русија за Украина
Унгарскиот премиер Виктор Орбан ја повика Европската унија да започне директни преговори со Русија за Украина, објавија денеска светските медиуми, повикувајќи се на писмото на Орбан до претседателот на Европскиот совет, Антонио Кошта.

Орбан се изјасни против напорите на земјите од ЕУ да најдат консензус во однос на Украина, нагласувајќи ја неопходноста од преговори за прекин на огнот, пишува лондонскиот весник „Фајненшл тајмс“ (Фајненшл тајмс).

Според весникот, Орбан го испратил писмото откако официјален Брисел испратил нацрт-заклучоци за претстојниот самит на лидерите на ЕУ.

Премиерот на Унгарија го привлече вниманието на очигледното присуство на стратешки разлики во пристапот на членките на ЕУ кон Украина, кои „не можат да се надминат ниту со подготовка на проекти, ниту со комуникации“.

Упатените тврдат дека унгарскиот амбасадор во Европската унија изразил слични размислувања на средбата со други дипломатски претставници во петокот во Брисел.

Се прецизира дека и Орбан и амбасадорот се повикале на резолуцијата на Советот за безбедност на ОН усвоена оваа недела со поддршка на САД и Русија.

Според шефот на унгарската влада, овој документ означува нова етапа во историјата на конфликтот и ги прави ирелевантни сите претходни формулации на Европскиот совет.

По првиот телефонски разговор меѓу претседателите на Русија и САД на 12 февруари, европските политичари почнаа да бараат место на преговарачка маса за решавање на украинската криза.