Унгарскиот премиер Виктор Орбан денеска изрази сомнеж дека Унгарија ќе добие навремена помош од Европската унија поради поплавите што ја зафатија таа земја и неколку други земји од Централна и Источна Европа.
„Со сета почит, ако чекаме Брисел да не спаси, ќе бевме до врат во вода“, рече Орбан на конференцијата утринава.
Како што објасни Орбан, секоја земја-членка на ЕУ може, по известувањето, самостојно да го активира механизмот предвиден за вонредни ситуации, што претходно го правеше Унгарија, пренесува Политико.
Унгарија е последната земја во низата погодена од поплави. 21 лице загина во Полска, Чешка, Австрија и Романија.
Орбан претходно оваа недела објави дека ги одложил своите меѓународни обврски додека поплавите не стивнат, вклучително и дебатата во Европскиот парламент за унгарското претседателство со Советот.
Тој утрово се осврна на говорот на претседателката на Европската комисија, Урсула фон дер Лајен, која понуди помош.
„Ако се појави ситуација во една земја, постои механизам што може да се активира со еднострано известување. Ние го направивме тоа, што значи дека Брисел почна да испитува дали треба или не треба да се обезбеди некаква помош“, изјави унгарскиот премиер.
„Кога овие комплицирани процедури во Брисел ќе завршат – а ние не сме казнети со тоа што не ја добиваме помошта што ја заслужуваме, бидејќи сето тоа е сомнително во Брисел – тогаш ќе добиеме помош“, додаде тој. Програмата на Европската унија за следење на климатските промени, „Коперник“, пред пет дена почна да испраќа сателитски снимки од поплавените области во Унгарија, на барање на Будимпешта.
Затоа, се претпоставува дека острите забелешки на Орбан може да бидат последица на претходната одлука на Европскиот суд на правдата да ја казни Унгарија со 200 милиони евра поради кршење на европскиот закон за азил, пишува „Политико“.
„Засега, да ја погледнеме позитивната страна на работите и со почит да му се заблагодариме на Брисел што барем мисли на нас“, заклучи Орбан.
