Општинското ЈП за комунални услуги ќе врши транспорт на градежен шут и отпад, косење и чистење зелени површини…

Аеродромци отсега имаат можност да добијат нови комунални услуги од страна на Јавното претпријатие за комунални дејности на Општина Аеродром, што за прв пат се воведува во општините што се под Град Скопје.

Од Општина Аеродрoм информираат дека комуналните улуги опфаќаат: транспорт на градежен шут до депонија – пакуван во вреќи, кабаст, растителен, комунален отпад од домаќинства, од комерцијалниот и од индустрискиот сектор, како и мешан отпад, машинско косење зелени површини, гребење и собирање искосена трева, гребење трева пред косење со изнесување отпад (камења, гранки и друго), чистење зелени површини од листови, поставување контејнер за кабаст отпад на локација одредена од инвеститор, како и подигање на контејнери за кабаст отпад и транспорт до депонија.

Овие услуги, приватните и правните лица ќе можат да ги добијат за минимален паричен надомест со закажување на телефонскиот број: 072/270-886 како и на мејл адресата: [email protected].

Собраниот отпад ќе се третира според сите постојни законски регулативи и ќе се депонира во ЈП „Дрисла“ со кое Јавното комунално претпријатие на Општина Аеродром веќе има склучено договор, по претходно добиена дозвола за управување со отпад од страна на Министерството за животна средина и просторно планирање.

-Со воведувањето на овие нови услуги во голема мера ќе им се олесни на граѓаните управувањето со отпадот од нивните домови и компании, но се очекува и конечно да се стави крај на несоодветното фрлање шут и отпад на локации што не се наменети за тоа – потенцираат од Општина Аеродром.

Оттаму, истовремено ги информираат жителите дека инспекциските контроли се зајакнати и декаа секое несовесно однесување од страна на приватни или правни лица е подложно на парични казни.