Општините вршат проценка и санирање на штетите во поплавените подрачја

Општините вршат проценка и санирање на штетите по поплавите предизвикани од излевањето на Маркова Река од своето корито, во вторникот вечерта. Беа зафатени делови од Студеничани, Кисела Вода и Аеродром, при што беа поплавени неколку куќи, магацини и индустриски објекти во селата Студеничани, Батинци и делови кон Пинтија.

Градоначалникот на Општина Студеничани, Азем Садики, информираше дека полека се нормализира состојбата, дека во моментов, со машини и багери од локални фирми, се расчистуваат наносите по поплавата, дека се чисти коритото на реката и се заштитува појасот онаму каде што имало прелевање.

Воедно, на одржаната вонредна седница била формирана комисија за проценка на штетите, која, како што кажа, веќе е на терен.

Садики повтори дека по извршената проверка од стручни лица, првиот мост на влезот во селото Батици уште во текот на вчерашниот ден бил пуштен во сообраќај.

Општина Аеродром ги повика жителите што имаат имот во поплавеното подрачје по текот на Маркова Река во Горно Лисиче, да ги пријават материјалните штети со поднесување пополнет образец во архивата на Општина Аеродром или во Урбаната заедница во Горно Лисиче, секој работен ден од 8:00 до 15:00 часот.

Рокот за поднесување на пријавите трае десет работни дена од денот на излевањето на Маркова Река што се случи во вторникот, 1 април, а повикот ќе трае заклучно со 14 април, понеделник.

Покрај пополнување на ова барање, подносителите треба да достават и важечки документ за идентификација, доказ за сопственост (копија од имотен лист), како и фотографии од локацијата по претрпената штета.

По обилните дождови во изминатите денови, од своето корито се излеа Маркова Река, при што беа поплавени и делови по текот во Горно Лисиче. Од Општина Аеродром информираат дека веднаш по излевањето, била ангажирана механизација, која работела на одводнување на коритото на реката и на заштита од евентуални поплавувања на објектите за домување.

– Според информациите од терен, нема нанесени штети на куќите, но се поплавени неколку магацини и земјоделски објекти, како и дел од полето во Горно Лисиче – истакнаа од локалната самоуправа.

(А. П.)