ООУ „Партенија Зографски” ќе го започне второто полугодие со целосно молерисани училници, односно вкупно 20 кабинети, од кои 11 кабинети од одделенска настава и 9 кабинети од предметна настава.
-Покрај молерисувањето, набавена е информатичка опрема, клупи, столчиња, компјутери и со тоа ООУ „Партенија Зографски“ добива целосно нов кабинет по информатика – соопштија од Општина Кисела Вода.
Освен за кабинетот по информатика, набавени се клупи и столчиња за кабинетите од второ одделение, како и столчиња за кабинетите од прво одделение.
ООУ „Партенија Зографски“ е едно од ретките училишта каде што столчињата за најмалите се со ергономски дизајн кој дава чувство на поудобно седење, анатомски заоблени рабови и димензија што соодветствува на висината на учениците и е важно за правилно држење на телото во текот на наставата.
Како за учениците, така и за наставниците набавени се нови столчиња и во наставничката канцеларија, а набавени се и нови дидактички материјали кои ќе ја унапредат и олеснат наставата и ќе ја направат позабавна и покреативна за учениците.
Дополнително, поставени се и нови ЛЕД-светилки во 10 училници.
