Од заборавена, Пинтија стана модерна, урбана населба, по мера на граѓаните.
Градоначалникот на Општина Кисела Вода, Орце Ѓорѓиевски, истакна дека во Пинтија се реконструирани сите краци на улицата „Јабланица“, како и „Саса 12“, исто така со сите нејзини краци, со асфалт и со павер елементи.
– Претходно, трансформиравме едно запуштено место во нов плоштад – простор за уживање на жителите од овој дел на Општината. Изградивме пешачки патеки, поставивме урбана опрема, направивме детско катче, сето тоа збогатено со парковско зеленило. Пинтија доби и современ спортски центар со еластична тартан подлога. За првпат од своето постоење, Пинтија добива и спортска сала во рамките на подрачното училиште, која ќе биде завршена за многу брзо време – потенцираше Ѓорѓиевски.
Тој додаде дека оваа населба, по повеќе од 40 години, добива фекална канализација.
– Веднаш по завршувањето со изградбата на фекалната канализација и приклучувањето на сите домаќинства во мрежата, ќе се асфалтираат улиците и со тоа во Пинтија повеќе нема да има ниту една неасфалтирана улица – наведе Ѓорѓиевски, додавајќи дека Општината ќе продолжи рамномерно да вложува во секое населено место.
