Од луксузните вили на Ентони Хопкинс, Мел Гибсон, Били Кристал, Парис Хилтон…остана само пепел; Уништени домовите на голем број холивудски ѕвезди  

„Додека сите ние се бориме да закрепнеме од уништувањето на пожарите, важно е да запомниме дека единственото нешто што секогаш можеме да го земеме со себе е љубовта што ја даваме“, рече оскаровецот Ентони Хопкинс, кој го изгуби својот дом по големиот пожар што го зафати Лос Анџелес

Оскаровецот Ентони Хопкинс, актерите Мел Гибсон, Били Кристал, Јуџин Леви, Адам Броди, Кери Елвис, Лејтон Мистер, потоа Парис Хилтон, оскаровката текстописец Дајан Ворен, водителката на ток шоуто Рики Лејк, риалити ѕвездите Спенсер Прат и Хајди Монтаг се славните личности кои ги изгубија своите домовите во големиот пожар кој деновиве го погоди Лос Анџелес.

Американските медиуми јавија дека на 30.000 луѓе им било наредено да се евакуираат во вторникот бидејќи шумски пожар им се заканува на домовите во областа Пацифик Палисадес во Лос Анџелес. Погодената област е дом на многу познати личности, вклучувајќи ги Том Хенкс, Рис Витерспун и Мајкл Китон. Шумските пожари, кои зафатија повеќе од 27.000 хектари, се меѓу најразорните во историјата на Лос Анџелес, оставајќи ги заедниците уништени и со безброј животи засекогаш сменети. Досега се потврдени 16 жртви, меѓу кои и поранешниот детски актер Рори Калум Сајкс. Преку 1.000 градби се уништени од пожарот во Пацифик Палисадес, според началникот на пожарникарите на округот Лос Анџелес, Ентони Мароне.

Домот на оскаровецот Ентони Хопкинс во Пацифик Палисадес стана куп урнатини од пожарот, а по настанот тој сподели емотивна порака на социјалните мрежи.

„Додека сите ние се бориме да закрепнеме од уништувањето на пожарите, важно е да запомниме дека единственото нешто што секогаш можеме да го земеме со себе е љубовта што ја даваме“, рече Хопкинс.

Меѓу познатите ѕвезди кои ги загубија своите домови е и актерот Мел Гибсон, кој откри со што се соочува неговото семејство.

„Ова е очигледно поразително. Емотивно е. Живеев таму долго време и таму ги имав сите мои работи. Сега како да сум ослободен од товарот на моите работи бидејќи сè е во пепел“, изјавил тој за „Њуз нејшн“.

Американскиот актер Били Кристал, познат по филмовите како „Кога Хари ја запозна Сали“ и „Анализирај го ова“, и неговата сопруга Џенис исто така потврдија дека нивниот дом по 46 години го нема.

„Зборовите не можат да ја опишат огромната пустош на која сме сведоци и кои ги доживуваме. Тука ги одгледавме нашите деца и внуци. Секоја педа од нашата куќа беше исполнета со љубов. Убави спомени што не можат да се одземат“, рече парот.

Парис Хилтон на „X“ сподели снимка од она што остана од нејзиниот дом во Малибу. „Стојам овде на местото кое некогаш беше наш дом, а тагата е неопислива. Ова е нешто што никој никогаш не треба да го доживее“, напиша таа.

Меѓу погодените од висок профил беше и Ана Фарис, чиј дом од 5 милиони долари и 4.000 квадратни метри беше уништен. Јуџин Леви, ѕвездата на Schitt’s Creek и почесен градоначалник на Палисадес, исто така го загуби својот имот вреден 3,9 милиони долари. Неговиот син Ден Леви напиша на социјалните мрежи: „Срцето е скршено за моето семејство, моите пријатели и луѓето од ЛА се погодени од катастрофалните пожари“.

Актерот од серијата Општата болница Камерон Матисон на Инстаграм сподели видео од она што останало од неговиот дом по пожарот. „Ова е она што остана од нашиот прекрасен дом. Нашиот дом каде што нашите деца беа израснати и каде што тие сакаа да го подигнат својот еден ден“, рече Матисон.

Други познати личности, пак, се појавија на социјалните мрежи за да споделат ажурирања за евакуации додека пожарот се шири. Актерот Џејмс Вудс изјави дека се евакуирал.

„До сите прекрасни луѓе кои ни се обратија, ви благодариме што сте толку загрижени. Само да ве известиме дека успеавме успешно да се евакуираме. Во овој момент не знам дали нашиот дом сè уште стои, но за жал, куќите на нашата мала улица не“, рече Вудс на „X“.

На Инстаграм, и актерот од „Војна на ѕвездите“, Марк Хамил, рече дека се евакуирал со сопругата и кучето. Тој го нарече „најстрашниот“ пожар што го видел од 1993 година.

Пожарот запре пред вилата на Том Хенкс

Куќата на Том Хенкс во Лос Анџелес, вредна 26 милиони долари, чудесно ја избегна стихијата на пожарот. Имотот, кој актерот и неговата сопруга Рита Вилсон го купиле во 2010 година, бил за влакно спасен од уништувањето на пожарот кој сопрел непосредно пред нивниот двор. Соседната вила на ридот била целосно уништена. Иако Том и Рита засега не се огласиле, се претпоставува дека морале да се евакуираат. Синот на парот, Чет Хенкс, на социјалните мрежи напиша: „Населбата во која пораснав сега буквално гори до темел. Молете се за Палисадес“.

Актерката Џејми Ли Кертис изјави на Инстаграм дека нејзиниот дом е безбеден. „Тоа е застрашувачка ситуација и јас сум им благодарна на пожарникарите и на сите доброволци кои им помагаат на луѓето да се тргнат од патот на пожарот“, рече Кертис.