Доколку пропаднат преговорите за нов нуклеарен договор, воената конфронтација со Иран станува речиси неизбежна, предупреди францускиот министер за надворешни работи Жан-Ноел Баро.

Американскиот претседател Доналд Трамп му се закани на Техеран со интензивна кампања на бомбардирање доколку не признае дека има нуклеарна програма, за која Вашингтон тврди дека е насочена кон развој на атомско оружје. Иранската влада, која категорично ги негира обвинувањата, рече дека решително ќе одговори на секој напад.

Обраќајќи им се на француските парламентарци, Баро истакна дека отсуството на нов договор може да доведе до сериозна дестабилизација на Блискиот Исток.

Договорот од 2015 година, познат како Заеднички сеопфатен план за акција, ги ограничи нуклеарните активности на Иран во замена за олеснување на санкциите. Сепак, во 2017 година, Трамп еднострано ги повлече САД од договорот, опишувајќи го како „најлошиот можен договор“ и започна кампања на „максимален притисок“ преку санкции.

Европската унија се обиде да го спаси Заедничкиот сеопфатен план за акција дозволувајќи му на Иран да ги заобиколи американските санкции, но преговорите заглавија. Како одговор, Техеран одби да ги исполни своите обврски од договорот, обвинувајќи го Западот дека го прекршил.

Од почетокот на својот втор мандат во јануари, Трамп постојано се закануваше со воена акција доколку Иран не се согласи на нов договор. Во едно неодамнешно интервју, тој рече: „Ако не се договорат, ќе има бомбардирање – какво што досега не виделе“.

Врховниот водач на Иран, ајатолахот Али Хамнеи, одговори со заканувачки тон, предупредувајќи дека САД и Израел „неизбежно ќе доживеат силна одмазда“ доколку го нападнат Иран.

Во услови на зголемени тензии, Пентагон најави распоредување на дополнителни воени сили на Блискиот Исток. Според извори на Ројтерс, четири бомбардери Б-2 се преместени во база на островот Диего Гарсија, стратешки позиционирана за можни воени операции против Иран.

ИЗДВОЕНИ

ПОВРЗАНИ ОБЈАВИПОВЕЌЕ ОД АВТОРОТ