ОЧАЈНО ВРЕМЕ ТЕРА НА ОЧАЈНИ МЕРКИ: Богаташи од Лос Анџелес им плаќаат по 2.000 долари на час на приватни пожарникари за да ги спасат своите вили од пламените јазици

Жителите на Калифорнија се револтирани откако беше откриено дека елитата на Лос Анџелес вработува приватни пожарникари за дури 2.000 долари на час за да ги заштити своите домови вредни милиони долари.

Три големи пожари моментално го опустошуваат Лос Анџелес, уништувајќи се што им се наоѓа на патот. Според последните податоци, во катастрофата загинале 16 лица, додека повеќе од 10.000 згради се уништени, а стотици илјади граѓани се евакуирани, пишува Dailymail.

За да ги заштитат своите инвестиции, супербогатите жители на Тинселтаун најмуваат скапи приватни пожарникари кои користат светло розе средство за заштита од пламен, што предизвикува негодување во јавноста.

Кит Васерман, ко-основач на инвестициската фирма за недвижнини Gelt Venture Partners, предизвика особено бес кога побара „приватни пожарникари“ на платформата X (поранешен Твитер) за да го заштитат неговиот имот во елитната населба Пацифик Палисадес.

„Дали некој има контакт со приватни пожарникари кои можат да ја заштитат нашата куќа во Пацифик Палисадес? Треба брзо да дејствуваме. Сите куќи во соседството се во пламен. Ќе платиме колку што ни треба. Ви благодариме“, рече тој во порака.

Корисниците на социјалните мрежи го осудија апелот на Васерман, нарекувајќи го „неверојатно бесчувствителен“. Еден коментар гласеше:

„Неверојатна дрскост. Неговото семејство е евакуирано и тој се обидува да ангажира приватни пожарникари да ги ризикуваат своите животи за да ја спасат куќата што тој сигурно ја осигурал. Неверојатно бесчувствително“.

Васерман им возврати на критичарите, нарекувајќи ги „тролови“. Втората критика беше уште поконкретна:

„Значи, предлагате потенцијалните спасувачки ресурси (дури и ако се „приватни“) да се пренасочат кон спасување на вашата куќа затоа што сте богати, додека десетици илјади луѓе се обидуваат да се евакуираат?

Васерман не е сам меѓу елитата во Лос Анџелес, која е на удар на критики за трошење ресурси, вклучително и вода, кои би можеле да се користат за гаснење пожари.

Од 2022 година на сила се строгите мерки за заштеда на вода, со кои „обичните“ жители се ограничуваат да ги полеваат бавчите два пати неделно по осум минути.

Ким Кардашијан, сопственичка на куќа вредна 60 милиони долари во луксузниот комплекс „The Oaks“, истата година е казнета поради користење на повеќе од 750.000 литри вода повеќе од дозволеното. Казнети се и други познати личности, меѓу кои Силвестер Сталоне и комичарот Кевин Харт.

До недела наутро, пожарот во Пацифик Палисадес, западно од центарот на Лос Анџелес, изгоре околу 22.660 хектари, додека пожарот во Итон, североисточно од градот, изгоре 14.100 хектари.

Бројот на загинати во шумскиот пожар во областа на Лос Анџелес се искачи на 16, додека пожарникарите се борат да го локализираат пожарот пред да се вратат силните ветрови кои би можеле да го поттикнат пламенот кон некои од најпознатите знаменитости во градот.

Високиот ризик од ширење на шумски пожари во Калифорнија ќе продолжи и во следните неколку дена, а црвеното предупредување ќе остане на сила до среда за поголемиот дел од американската сојузна држава, со оглед на тоа дека не се очекува слабеење на ветрот што го отежнува гаснењето на пожарите.

Зоната на критичен ризик од пожар вклучува област во која живеат повеќе од осум милиони луѓе, објави ABC News.