Општина Илинден реализира повеќе активности во насока на подобрување на условите во општинското училиште „Ристо Крле“ во Кадино.
Како што посочи директорот на училиштето, Јовче Петковски, во тек е изградба на нови тоалети за учениците од прво одделение и адаптација на просторија за кујна, со цел воведување на продолжен престој, се врши партерно уредување на училишниот двор во подрачното училиште во Мралино, на површина од 780 квадратни метри, како и паркинг за вработените.
Исто така, обезбедена е опрема со три фотокопири за централното и подрачните училишта, а наставниот процес е подобрен со нови нагледни средства и тоа за учениците од прво до петто одделение во подрачното училиште во Бунарџик. Воедно, обезбеден е нов училишен мебел во централното училиште со училишни клупи, столчиња, како и клупи за ходниците и пулт за информации, како и училишни паноа во кабинетите.
Градоначалникот на Општина Илинден, Александар Георгиевски, го посети ООУ „Ристо Крле“ во Кадино и истакна дека локалната самоуправа континуирано работи на обезбедување услови за образованието и успешно реализирање и подобрување на воспитно образовниот процес во сите училишта на нејзина територија.
-Инвестициите во образованието се од огромно значење за иднината на една општина, па затоа реконструкцијата и модернизацијата на општинските училишта е еден од приоритетите во работењето – заклучи Георгиевски.
ООУ „Ристо Крле“ е изградено пред 45 години, а заедно со подрачните објекти во населените места Мралино и Бунарџик учат вкупно 320 ученици, така што локалната самоуправа и понатаму ќе работи за подобрување на условите за работа и воспитно образовниот процес.
