„Новата ренесанса“ ќе и обезбеди на Мона Лиза засебна соба во Лувр: Макрон најави реновирање на култниот музеј во Париз

Франција ќе започне шестгодишно реновирање на Лувр во Париз, проширувајќи го најпосетуваниот музеј во светот за да направи простор за голем број луѓе, изјави денеска претседателот Емануел Макрон.

– Новиот влез ќе го олесни влегувањето и излегувањето, а во посебна област со посебен влез ќе биде сместена главната атракција, Мона Лиза на Леонардо да Винчи, рече Макрон додека стоеше до уметничкото дело.

Почнувајќи од следната година, музејот ќе наплаќа и повисока влезница за посетителите надвор од Европската унија, рече тој.

Претседателот на Лувр, Лоренс де Карс, минатата недела предупреди дека вековната зграда – некогаш раскошната палата на француските кралеви – е во лоша состојба и дека истекувањето на вода и температурните промени може да го загрозат зачувувањето на уметничките дела.

Посетата на музејот стана „физички напорна“, бидејќи во збунувачкиот распоред на собите тешко е да се пронајдат уметничките дела, а и просторот е премал за посетителите да се одморат, да јадат или да го користат тоалетот, рече Де Карс.

Лувр сега има девет милиони посетители годишно, што е над двојно повеќе од четирите милиони кои беше дизајниран да ги прими кога беше модернизиран во 80-тите. Реновирањето ќе го зголеми капацитетот на 12 милиони, рече Макрон.

Соработниците на Макрон рекоа дека проектот на Лувр наречен „Нова ренесанса“ се очекува да чини меѓу 700 и 800 милиони евра.