Нова студија: Високите температури секоја година до крајот на веков ќе убиваат 8.000 до 80.000 Европејци

Опаснoто зголемување на температурите би можело да убие 50 проценти повеќе луѓе во Европа до крајот на векот, покажа студија на „Нејчр медисин“.

Истражувачите процениле дека во најоптимистичкото сценарио за намалување на загадувањето од загревањето на планетата, по 8.000 луѓе ќе умираат секоја година како резултат на субоптимални температури. Според песимистичкото сценарио, таа бројка би се зголемила на 80.000. Студијата во сценариото за големо загревање предвидува дека во Европа во периодот помеѓу 2015 и 2099 година, опасните температури ќе предизвикаат смрт на 2,3 милиони луѓе на континентот, пишува „Гардијан“

Наодите на оваа студија го оспоруваат аргументот популарен меѓу оние кои велат дека глобалното затоплување е добро за општеството, бидејќи помалку луѓе ќе умрат од студеното време.

-Сакавме да го тестираме ова. И јасно покажуваме дека ќе имаме нето зголемување на смртните случаи, поврзани со температурата поради климатските промени, рече Пјер Маселот, статистичар од Лондонската школа за хигиена и тропска медицина и главен автор на студијата.

Студијата се надоврзува на претходните истражувања во кои научниците ја поврзаа температурата со стапката на смртност за различни возрасни групи во 854 града низ Европа. Тие истражувања ги комбинираа со три климатски сценарија кои мапираат можни промени во структурата на населението и температурата во текот на векот. Притоа открија дека во сите три сценарија, непријатните температури би убиле повеќе луѓе отколку денес.

Се прогнозира дека нето бројот на починати најмногу ќе се зголеми во топлата јужна Европа, особено околу Медитеранот. Второто жариште би била Централна Европа, што ги покрива Швајцарија, Австрија и делови од јужна Германија и Полска. Во поладната северна Европа, пак, се очекува мало намалување на смртните случаи.

-Во Норвешка, на пример, може да видиме многу мала придобивка. Но ова ќе биде  целосно засенето од масовното зголемување на смртните случаи што го гледаме во јужните земји, рече Маселот, пренесе „Гардијан“.

Топлината и студот се тивки убијци кои многу го повредуваат телото пред да дојде до крајности кои предизвикуваат хипотермија и топлотен удар. Бројот на  смртни случаи расте за време на топлотните бранови, особено кај луѓето кои се стари или болни, бидејќи топлото време ги напрегнува нивните тела и не дозволува да се одморат. Настинките, пак, го зголемуваат крвниот притисок и придонесуваат за низа проблеми со срцето и белите дробови.

-Општо кажано, затоплувањето ќе убие повеќе луѓе отколку што ќе спаси намалувањето на студот, рече Тим Озборн, климатски научник од Универзитетот во Источна Англија, кој не беше вклучен во истражувањето.

Екстремната топлина убива, но предизвикува и широк спектар на сериозни здравствени проблеми. Тоа е поврзано со зголемен ризик од кардиоваскуларни болести, спонтани абортуси и лошо ментално здравје, појаснува Медлин Томсон, експерт за клима и здравје.