Нов бран покачување на платите во институциите на ЕУ! Седмо во последните 3 години

Околу 66.000 вработени во институциите на Европската унија од април повторно ќе земаат повисоки плати. Ова е седмо покачување на платите од почетокот на 2022 година. Ова зголемување се однесува на додатокот за 2024 година. Првично лани требаше да се зголемат платите за 8,5 отсто, но дури и Европската комисија утврди дека тоа е премногу. Ја користеше таканаречената „клаузула за умереност“ и првично исплати „само“ 7,3 проценти. Останатите 1,2 отсто ќе следат сега во април, пренесува Билд.

Kолку ќе се зголемат платитe?

Минималната основна плата (без паушалните суми кои не се оданочуваат) ќе се зголеми од 3.361 евра на почетокот на 2024 година на 3.645 евра нето од април оваа година. Највисоката плата од 23.262 евра ќе се зголеми на 25.229 евра. Од ова зголемување имаат корист и членовите на Европската комисија.

Основната плата на претседателката Урсула фон дер Лајен се зголеми за повеќе од 2.700 евра од почетокот на 2024 година на околу 34.800 евра месечно. Еврокомесарите сега ќе заработуваат околу 28.400 евра, што е 2.200 евра повеќе.

Вработените во ЕУ користат сосема нејасна формула за пресметување на нивните плати. Ја зема предвид инфлацијата во Брисел и Луксембург и развојот на платите во јавните служби на земјите-членки.

Вообичаено, платите се зголемуваат еднаш годишно ретроактивно од 1 јули. Но, поради силната инфлација во последните години, беше искористена посебна одредба, а дел од зголемувањето беше исплатено уште на 1 јануари. Поради тоа од 2022 година вработените во ЕУ земаа повисоки плати и на 1 јануари и на 1 јули. Годинава се можни дури три покачувања на платите. Доколку стапката на инфлација не падне, додатокот за 2024 година прво ќе се исплати од април, потоа од средината на годината може да има однапред одредено зголемување ретроактивно од јануари, а подоцна и остатокот од зголемувањето од 1 јули, пренесува Феникс магазин.