„Никогаш нема да ја исчистиш дамката од своето име“

Италијанскиот тенисер Јаник Синер се договори со Светската антидопинг агенција (ВАДА) да ја прифати тримесечната суспензија за да ја повлече жалбата против него пред Судот за спортска арбитража (CAS) во Лозана. ВАДА се пожали дека Синер останал неказнет во крајно чудна и нетранспарентна постапка, барајќи да биде суспендиран најмалку една година, за да заврши со „вонсудска спогодба“ од која никој, освен Синер, не е задоволен.

Иако сè беше направено пресметано за да се врати точно навреме за мастерсот во Рим и за да може да игра на Ролан Гарос, угледниот тениски коментатор, Маркус Бакланд, истакнува дека Синер направил голема грешка што се решил. Иако го разбира стравот од потешка казна, откако ја прифати спогодбата со ВАДА, тој ја призна вината.

– Најлошо нешто за Синер се како изгледа ова отстрана и временската рамка на суспензијата. Повеќето луѓе ќе се согласат дека Синер не се обидуваше да мами, но најголем проблем за него е крајниот резултат. Практичноста на суспензијата што ја доби, всушност, треба да биде голем проблем. Фактот што е суспендиран на три месеци, меѓу два грен-слема, и можноста да се врати на турнир во својата земја имаат некаква услуга. Најтажно е што ќе остане поврзано ова со него до крајот на кариерата, без разлика што ќе постигне на теренот – забележува познатиот тениски коментатор.

Тој е свесен дека засекогаш ќе остане дамка на името на Синер. Дури и да се докаже дека е целосно невин во случајот, тој веќе се согласил да биде виновен.

Малку се оние што застанаа на страната на Синер, пред сè затоа што се свесни дека тој е привилегиран во однос на другите тенисери, кои се справувале со слични проблеми во кариерата. Договорот за „суспензија“ не помогна.

– Сега се ближи крајот на оваа приказна, но тенисот стана толку поделен што ова прашање секогаш ќе го следи Синер – рече Бакланд.

Тој потоа го вмеша Ѓоковиќ:

– Гледате на социјалните мрежи дека навивачите на Новак Ѓоковиќ се толку страсни во својата одбрана и во исто време го мразат Рафаел Надал. Сакаме луѓето да зборуваат за тенисот, но тоа може да доведе до непријатна нетрпеливост во спортот. Се разбира, може да ги имате вашите обожаватели, но мора да ги почитувате достигнувањата на другите играчи.