Никако да процвета љубовта меѓу „комитите“ и Миленко

Ред убави вести, ред проблеми, ред убави вести, ред проблеми. Со овие зборови најдобро може да се опише моменталната ситуација кога е најтрофејниот фудбалски клуб во Македонија, Вардар, во прашање.

„Црвено-црните“ се убедливо најпријатното изненадување во пролетниот дел од сезоната. Четата на Гоце Седлоски веќе подолг период не знае за пораз и обезбеди пласман во полуфиналната рунда од Купот на Македонија.

Точно дека триумфот над Силекс во Купот и победата над вечниот ривал, Пелистер, во првенството беа зачинети со неколку соопштенија од поразените, дека биле оштетени со спорни судиски одлуки, но тоа е нешто сосема нормално кога е најважната споредна работа на денешницата во прашање.

Има хармонија и успех на зелениот терен, но не може да се каже тоа и за односот помеѓу раководните лица и најверните навивачи. Не е тајна дека популарните „комити“ не се во љубов со извршниот директор Миленко Неделковски, а таквата нетрпеливост повторно е во прв план.

„Комитите“ гостуваа во Струга, каде што беа избркани од трибината поради недолично навивање. На своја рака, без поддршка од клубот, гостуваа во Кратово. Поради трагедијата во Кочани, одлучија да не гостуваат во Битола, а викендов, повторно на своја рака и без клупска поддршка, најавуваат гостување во Струмица.

На својата фејсбук-страница, „комитите“ напишаа дека управата на ФК Вардар повторно не пријавила присуство на гостински навивачи.

– За натпреварот против АП Брера ќе мораме повторно сами да се избориме, затоа што управата повторно се дрзна да не го пријави нашето присуство, а со тоа и да спречи наш организиран превоз за натпреварот во Струмица!

Дојдовме во Кратово, ќе дојдеме и во Струмица – секогаш и секаде за Вардар! Нашиот став е јасен, и нема бегање од него – напишаа најверните навивачи на Вардар.

Претходно, „комитите“ и Миленко Неделковски влегоа во клинч и за Борјан Ефтимов, кој е дел од движењето „Кој е следен?“. Извршниот директор на Вардар тврдеше дека Ефтимов е дел од Здружението „35 години вардарци“, но експресно беше демантиран.

– Во име на групата и на Здружението „35 години вардарци“, ги демантираме сите лаги што ги изрече лицето Миленко Неделковски. Во своите обиди да го разниша единството што владее меѓу вардаровата јавност, со цел поткопување на заедничкиот став против управата на клубот, односното лице повторно се служи со лажни обвинувања без притоа да приложи каков било аргумент.

Целта е јасна: дефокус, избегнување лична одговорност за досегашните лошо менаџирање на клубот и создавање лажна слика дека некој друг, а не самиот тој, е виновен за атмосферата на релација навивачи – управа.

Борјан Ефтимов, лицето што, во своите објави, Миленко Неделковски го поврзува со нашата група и со нашето Здружение, ниту е член на Здружението, ниту е дел од основачкото Собрание, како што се наведува.

Со самото тоа, паѓа во вода обвинувањето дека Здружението, во кој било момент, било злоупотребено за цели што не се поврзани со основните начела на Здружението, а тоа се: афирмација на ФК Вардар и борба за клубот. Како тогаш, исти сме и сега, докрај верни на клубот и на групата!

Претходно, Неделковски, на својот ФБ-профил, напиша дека лицето Бојан Ефтимов е еден од петтемина членови/основачи, а воедно и адвокат на Здружението „35 години вардарци“.

– Пратеникот Стојаноски говори за лицето Бојан Ефтимов, еден од петтемина членови/основачи, а воедно и адвокат на Здружението „35 години вардарци“, кои се претставуваат за комити, ВМРО-вци, десничари, демохристијани, Македонци, патриоти…

Па прашањето е дали и другите членови на Здружението се истомисленици со антивмровски настроениот Бојан или овој отпадок им се има инфилтрирано за да ги искористи и злоупотреби во партиски цели.

Дека управата на ФК Вардар, на чело од Миленко Неделковски, и најверните навивачи се на различна бранова должина, потврди и првиот човек на Здружението „35 години вардарци“, Милорад Миленковски, во ексклузивното интервју што го даде за весникот ВЕЧЕР, на 14 февруари.

– Потребна е позитивна енергија, Вардар е креиран да ги привлекува луѓето, да бидат горди на нешто на што ќе се радуваат, а не како што стојат работите моментално. Голем број навивачи избегнуваат да ги следат натпреварите во живо, поради енергијата што се генерира. Со лоша енергија, нема убави работи, дури и успехот не е толку голем кога е лоша енергијата. Имаме различни приоритети, на Вардар секогаш треба да му биде приоритет враќањето на публиката на стадион. Не знам кои се приоритетите на новото раководство, но без разлика дали се согласувам или не, јас секогаш посакувам успех, фудбалерите да бидат здрави, да обезбедиме опстанок и да славиме во Купот на Македонија. Веруваме дека зад оваа фасада на лоша енергија постои некоја добра намера, која ќе ги движи работите во вистинската насока, а ние сме секогаш тука за поддршка и без никакви суети – изјави Миленковски.

Вардар моментално е на осмата позиција во домашниот шампионат, а за противник во полуфиналето од Купот на Македонија го има тимот на АП Брера.