Ден потоа, кога со мрачно лице со неверување го слушаше првиот дел од одлуката на судот дека практично и е забрането да учествува на следните претседателски избори во Франција, лидерката на француската суверена десница, Марин Ле Пен, настапи повеќе од треперливо на состанокот на пратеничката група на нејзината партија.
– Системот извади нуклеарна бомба. Тој користи толку моќно оружје затоа што сме на пат да победиме на изборите – испрати таа алармантна порака.
Веднаш штом помина првиот шок, Ле Пен тргна во контранапад. Прво судски со жалба, а потоа и медиумски. Нејзиното вечерно интервју на денот на историската пресуда го погледнале осум милиони гледачи. Ден подоцна, пред пратениците на нејзината група во народното собрание, таа влезе со рака на срце, со аплауз од сите присутни.
-Едно е многу јасно. Нема да се откажеме. Ни ги украдоа изборите со скандалозен маневар. Нема да дозволиме да им се украдат претседателските избори на Французите. Ќе одговориме, ќе ги искористиме сите средства што ни се на располагање за да им овозможиме на Французите да ја изберат својата идна влада. И ние ќе победиме – изјави фаворитот за иден претседател на Франција врз основа на сите испитувања на јавното мислење.
Таа беше придружувана од претседателот на партијата, Џордан Бардела, кој повика на популарни и пацифистички манифестации. Во политиката на мирен пристап, со цел сѐ да не наликува на народен бунт се вклопи и пораката на Ле Пен дека заканите кои ги добиле судиите се скандалозни.
-Милиони граѓани се револтирани. Нашата улога е да им овозможиме на Французите, кои се лути, мирно и демократски да се изјаснат против она што тие го гледаат како неправда – рече Бардела.
Ле Пен и Бардела продолжија да симболизираат совршено единство. На социјалните мрежи се појави „вест“ дека наводно веќе е одлучено Бардела да биде кандидат. Сепак, тоа е само резервна варијанта. Но, во насобраниот гнев на гласачкото тело, таа може да биде и добитна. Многумина веќе го гледаат дуото Ле Пен и Бардела како претседател и премиер, во овој или обратен редослед.
