Нема пари во брзо време за земјите од Западен Балкан

Првите исплати од Европскиот план за раст нема да бидат извршени во првиот дел од оваа година, туку се очекуваат меѓу вториот и третиот квартал на 2025 година, откако ќе се исполнат соодветните услови. Според објаснувањето на Прес-службата на Европската комисија (ЕК), плаќањата нема да се вршат пред средината на оваа година.

– Европската комисија сега ги финализира процедуралните чекори, кои треба да овозможат ослободување на предфинансирањето што е можно поскоро во 2025 година. Првите редовни исплати се очекуваат меѓу вториот и третиот квартал на 2025 година, откако ќе се исполнат соодветните услови – велат од ЕК.

Доброупатени за РСЕ велат дека проблемот е во земјите од регионот што треба да постигнат договор за заем со ЕУ, бидејќи едни финансиски средства се во форма на заеми, а други во форма на грантови. А, таквите договори имаат карактер на меѓународни договори и затоа мора да бидат ратификувани од парламентите на тие земји. Од Европската комисија нема прецизно објаснување во која фаза е секоја земја од регионот во однос на обврските неопходни за започнување на плаќањата.

Од ЕК посочуваат дека за да започнат реформите, земјите може да побараат до 7 отсто од предфинансирањето од вкупниот износ предвиден со овој инструмент (од првичниот индикативен износ на финансирање што е достапен за секој корисник). Ова го побараа сите пет корисници со одобрени реформски агенди (освен Босна и Херцеговина, која сѐ уште не доставила).