Некој го памети како Џим Морисон, некој како Ајсмен; Почина холивудскиот актер Вал Килмер

Почина холивудскиот актер Вал Килмер, познат по улогите на Џим Морисон, Ајсмен и Бетмен, чиј изглед и недофатлива личност го направија спореден актер од висок профил, напиша „Њујорк тајмс“. Тој имаше 65 години.

Причината е пневмонија, изјави неговата ќерка Мерцедес Килмер. На Килмер му бил дијагностициран рак на грлото во 2014 година, од кој подоцна закрепнал, рече таа.

Вал Килмер (31 декември 1959 – 1 април 2025) е роден во Лос Анџелес, Калифорнија. Висок и убав како рок-ѕвезда, тој, всушност, неколку пати бил избран за рокер на почетокот од својата кариера, кога се чинело дека е предодреден за успех во блокбастер филмовите. Своето долгометражно деби го имаше во неверојатниот шпионски филм, комедијата „Топ тајна!“ (Top Secret!) од 1984 година, во кој глумеше американски пејач во Берлин, несвесно вклучен во источногермански заговор за повторно обединување на земјата.

Тој остави силен впечаток со изведбата како Џим Морисон, амблем на психоделична сензуалност, во „Дорс“ (The Doors) од 1991 година, на Оливер Стоун, а ја играше и улогата на Ментор во романтичната криминалистичка драма „Вистинска романса“ (True Romance), напишана од Квентин Тарантино, во режија на Тони Скот, од 1993 година.

Помеѓу Мајкл Китон и Џорџ Клуни, беше и Бетмен и ја толкуваше насловната улога во „Бетмен засекогаш“ (Batman Forever) од 1995 година, водејќи битка во Готам Сити со стрип-ликовите Две Лица (Томи Ли Џонс) и Ридлерот (Џим Кери).

Го играше и урбаниот расипнички пиштолџија Док Холидеј во „Тумбстон“ (Tombstone), во 1993 година, крвав вестерн, заедно со Курт Расел, Сем Елиот и со Бил Пакстон како Вајат, Вирџил и Морган Ерп. Беше дел од банда крадци во „Жештина“ (Heat), од 1995 година и настапи заедно со Мајкл Даглас во „Духот и темнината“ (The Ghost and the Darkness), во 1996 година, филм за лов на лавови сместен во Африка, на крајот од 19 век. Во „Полок“ (Pollock) од 2000 година, тој му беше колегата уметник Вилем де Кунинг на Ед Харис, кој го толкуваше сликарот Џексон Полок. Го играше и Филип Македонски, таткото на Александар Велики, во грандиозниот еп „Александар“ (Alexander) на Оливер Стоун, од 2004 година.

Секако, ќе биде запаметен и по улогата на Ајсмен во високобуџетниот филм „Топ ган“ (Top Gun) од 1986 година, драма за тренинг на пилоти на американската морнарица, со Том Круз во главната улога. Ја повтори, со кратко појавување, истата улога во продолжението на филмот од 2022 година, „Топ ган: Маверик“.

На приватен план, бракот на Килмер со актерката Џоан Вели, која ја запозна на снимањето на фантастичниот филм за деца „Врба“ (Willow) во 1988 година, заврши со развод. Нивни деца се Мерцедес и Џек. Килмер живееше на ранч во близина на Санта Фе многу години, а еднаш размислуваше и да се кандидира за гувернер на Ново Мексико.