Неделава почнува со работа „Магна“, со 500-600 нововработени

Неделава ќе почне со работа производствениот капацитет на „Магна“, странски инвеститор во Штип, со 500 до 600 нововработени. Според премиерот Христијан Мицкоски, станува збор за инвестиција од 45 до 50 милиони евра. Тој најавува дека Владата е во преговори со околу педесетина заинтересирани инвеститори.

– Странски инвестиции секојдневно доаѓаат, разговараме и имаме околу петнаесетина што се во процес на развивање. Очекувам од нив, најмалку половина да бидат успешни, ако не и сите. Со тоа, државата повторно се зацврстува во регионот како дестинација за странски инвестиции, дестинација што ќе генерира и ќе апсорбира најголем број странски инвестиции по глава на жител. Таа цел лани беше реализирана, а целта е слична и годинава – рече Мицкоски.

ТИРЗ Штип е најголемата зона, со површина од 206.45 хектари. Лоцирана е северозападно од градот Штип, при влезот од правец на Скопје. Во зоната активно оперираат три компании, од кои едната се занимава со производство на производи наменети за автомобилската индустрија, другата со технички текстил и третата – со топлотни разменувачи за бојлери.