Не се сеќавам ниту на падот, ниту на операцијата

Францускиот скијач Сиприен Саразин имаше хорор-пад во декември, во текот на Светскиот куп во Бормио, Италија, поради што сè уште се рехабилитира од повредата. Тој е свесен дека „ќе умрел за малку“ и, според неговите зборови, воздушното перниче му го спасило животот.

• Повторно го видов мојот пад, но од моментот кога почнав да се лизгам на грб, малку безживотно, веќе не гледав. Но, го видов падот, беше доста убав, впечатлив – се пошегува Сиприен Саразин.

Тој оцени дека сето тоа можело да биде уште подраматично доколку тој ден не носел воздушно перниче.

• Мислам дека тој ден имав ангел чувар. Чудо е што закрепнав толку добро и толку брзо – додаде 30-годишниот скијач во текот на своето прво појавување во јавноста по падот на официјалниот тренинг во Бормио, на кој доживеа тежок потрес на мозокот.

Францускиот скијач, кој е во добра физичка форма, наведе дека повеќе нема невролошки последици.

• Нема омраза или разочарување, сфатив дека за малку немаше повторно да бидам тука, па што и да се случи, тоа е само позитивно – продолжи Саразин, кој го продолжува процесот на рехабилитација од сериозниот пад и по операцијата на мозокот.

Тој додаде дека е среќен што не се сеќава на падот и на операцијата, бидејќи тоа му помогнало да не се сеќава на тие тешки моменти.

• Не се сеќавам на периодот од 20 метри пред падот до пет дена по падот, по операцијата, благодарение на анестезијата што беше добра – објасни скијачот.

Тој се движи нормално, но, сепак, страда од диплопија, односно двојно гледање, иако од ден на ден се подобрува таа состојба.

• Бев свесен тие пет дена, но мојот мозок не го регистрираше тоа. И тоа е добро, бидејќи на тој начин немам посттрауматски стрес – изјави двократниот победник во спуст во Кицбил, Австрија и еден од најдобрите скијачи во брзински дисциплини денес.

Тој нагласи дека сè уште е рано да се зборува за враќање на натпреварите.

• Треба да одвојам време и само да се фокусирам на грижата за себе – изјави Французинот, кој, исто така, се здоби со повреда на десното колено и со голема модринка на грбот од самиот пад.

Напорната патека „Стелвио“, каде што скијачите достигнуваат екстремно големи брзини и каде што, на 27 декември, Саразин избегна повреди опасни за животот, ќе биде сцена на натпреварите за олимписки медали во февруари 2026 година. Но, тој сè уште не размислува да се натпреварува на таа трка.

• Имам период од четири до пет месеци пред да продолжам со некоја сериозна физичка активност, но, во меѓувреме, се занимавам со спорт – вели Французинот.

Тој додаде дека не е опасен спорт тоа, но истакна и дека особено се радува што повторно ќе може да вежба планински велосипедизам во спуст.

Што се однесува до повторното скијање, тој го нарекува „чекор два“. Не знае кога ќе се случи. Тврди дека живее за тоа, бидејќи не може да најде такво искуство никаде на друго место.