Политички земјотрес во Франција: Дали Ле Пен е „политички мртва“ по пресудата?

Од страна на
Вечер
-
340

Лидерката на партијата Национален собир во францускиот парламент, Марин Ле Пен, е прогласена за виновна за проневера на средства на Европската унија. Нејзината политичка кариера е доведена во прашање, бидејќи судот и забрани да се кандидира за јавна функција во следните пет години.

Лидерката на француската екстремна десница е осудена на четири години затвор, од кои најмалку две ќе бидат условни, со електронски мониторинг. Таа е казнета и со 100.000 евра и забрана да се кандидира за јавна функција во следните пет години.

Ова практично значи дека Марин Ле Пен нема да може да ги реализира своите планови и да се кандидира за претседател на Франција на изборите во 2027 година. Дури и ако се поднесе жалба, пресудата стапува во сила веднаш. Таа, исто така, ќе биде принудена да поднесе оставка од нејзината сегашна советничка функција во регион во северна Франција.

Покрај Марин Ле Пен, уште осум пратеници од Европскиот парламент од Националниот собир и 12 нивни помошници беа прогласени за виновни за злоупотреба на средства. Самата партија е казнета со два милиони евра.

За што точно е виновна и какви се реакциите?

Како функционираше системот на злоупотреба? Според пресудата, партијата Национален собир извлекувала пари од буџетот на Европскиот парламент за да ги плати вработените кои всушност никогаш не работеле во Европскиот парламент – ниту во Брисел ниту во Стразбур, каде што се наоѓаат двете официјални згради на институцијата.

Судот утврди дека Европскиот парламент претрпел отштета од 2,9 милиони евра, од кои Марин Ле Пен е одговорна за проневера на околу половина милион. Но, беше истакнато дека таа парите не ги искористила за лично богатење, туку за финансирање на партијата.

Судот донесе политичка одлука, а судијата направи грешка, рече Марин Ле Пен (56), претседателка на француската десничарска партија Национален митинг, во својата прва реакција откако во понеделник судот ја осуди на четири години затвор, со две години условно, за проневера и изрече петгодишна забрана за вршење јавна функција.

Во интервју за француската телевизија TF1, Ле Пен одговорила на прашањето зошто ја напуштила судницата пред да го сослуша судијата кој и изрекол пресуда.

– Не ми требаше повеќе. Сфатив што се случува. Судот се обиде намерно да ме спречи да се кандидирам во 2027, рече Ле Пен.

Според последните анкети таа имаше голема предност, а како што претходно најави ова требаше да и биде последна кандидатура откако три пати по ред беше неуспешна.

„Сега на милиони луѓе во Франција ќе им биде ускратена можноста да гласаат за фаворитот на следните избори“, рече Ле Пен.

Таа откри дека и покрај петгодишната забрана, „нема намера да се повлече од политиката“ и ќе ја продолжи жалбената постапка „најсилно колку што може“, бидејќи е цврсто убедена во нејзината невиност.

– Нема да се откажам. Не можам да дозволам вака да ме избркаат. Вечерва ви велам, не сум деморализирана, но сум како и вие скандализирана со одлуката. Се чувствувам огорчено. Но, таа огорченост, тоа чувство на неправда е дополнителен поттик за борбата што ја водам за гласачите. Милиони Французи веруваат во мене, за нив се борам 30 години.

На прашањето која би била нејзината потенцијална замена, а медиумите веќе го споменуваат 29-годишниот Џордан Бардел, таа одговори дека ќе се бори „додека не заврши“. Таа го опиша Бардел како „чудесна сила“ за нејзиното движење.

ИЗДВОЕНИ

ПОВРЗАНИ ОБЈАВИПОВЕЌЕ ОД АВТОРОТ