Фудбалерите на францускиот гигант ПСЖ го приредија најголемото изненадување во Лигата на шампиони откако во 1/8 финалната рунда го елиминираа англискиот премиерлигаш Ливерпул.
Четата на Луис Енрике имаше повеќе среќа во пенал рулетот во кој клучна улога имаше Џиџи Донарума, кој одбрани два пенали.
На крајот, ПСЖ благодарение на Италијанецот успеа да се пласира во следната рунда од натпреварувањето, но славјето на парижаните не траеше долго, бидејќи се појавија информации дека тој може да го смени клубот на лето.
Донарума има договор со ПСЖ до летото 2026 година, а во Париз прават се за да ја продолжат соработката со него, но тоа не оди според планираното.
Италијанецот е решен да го дочека летото и да донесе одлука, а во ПСЖ го притискаат тоа да го направи побрзо за да знаат што да прават доколку одбие да го продолжи договорот.
Во случај на негативен одговор, ПСЖ има намера да го продаде веќе на лето за да не замине бесплатно, а француските медиуми пишуваат дека „алармот се вклучил“ во Париз бидејќи дознале дека Донарума „флертува“ со друг клуб.
Неколку медиуми ја пласираа информација дека Баерн (М) покажал огромен интерес за Донарума и дека Италијанецот го гледаат како вистинскиот наследник на Мануел Нојер, кој наскоро ќе се пензионира.
Наводно, на Донарума му се допаѓа повикот од Минхен и затоа го одложува продолжувањето на договорот бидејќи сака да види дали Баерн (М) има намера да го доведе во својот тим за време на летниот преоден рок.
Баварците воспоставија контакт и идеално сценарио за нив е на Донаруми да му истече договорот и тој да дојде бесплатно, но ако треба ќе го купат веќе на лето.
Иако Донарума е прв голман на ПСЖ, тој има намера да бара нов предизвик и наводно поканата на Баерн (М) е многу примамлива за него.
Иако на сцената е десет години, Донарума има само 26 години и сигурно би бил идеално решение за германскиот гигант за во иднина.
