Израел им соопшти на САД дека планира „ограничена“ копнена операција во Либан која би можела да започне „наскоро“, објави Вашингтон пост, цитирајќи американски официјален претставник.
Американски официјален претставник изјави за весникот дека планираната кампања на Израел ќе биде „помала од неговата последна војна против Хезболах во 2006 година“ и ќе се фокусира на „расчистување на милитантната инфраструктура долж границата за да се отстрани заканата за израелските погранични заедници“.
Американските власти потврдија претходно вчера дека израелските сили во понеделник наутро спроведуваат специјални операции на либанска територија, во близина на израелско-либанската граница, јави Си-Ен-Ен.
Еден функционер ги опиша операциите за Си-Ен-Ен како „многу прецизни, многу насочени и мали рации“ – тип на операција „влез, излез“, со специфична цел да се неутрализираат способностите на Хезболах.
Американските власти во моментов не ги опишуваат израелските напади како копнена инвазија, иако внимателно се подготвуваат за можноста за ограничена копнена операција што би можела да следи во наредните денови.
Амбасадата на САД во Бејрут соопшти дека соработува со авиокомпаниите „на барањата на американските граѓани да го напуштат Либан“.
Во објавата на X, американската амбасада рече дека ќе обезбеди дополнителни летови за американските граѓани. Амбасадата на САД, исто така, ги повика американските граѓани кои моментално се наоѓаат во Либан „да бидат свесни за безбедноста на нивната околина и да преземат соодветни мерки за да се осигураат нивната безбедност “.
Во неделата, на некои вработени во американската амбасада во Бејрут и на членовите на нивните семејства им беше наредено да го напуштат Либан.
Претходно беше објавено дека израелските сили стационирале тенкови во близина на границата со Либан.
Во одвоено соопштение, државниот секретар Ентони Блинкен го осуди убиениот водач на Хезболах Хасан Насрала како „брутален терорист“ додека ги обнови повиците за дипломатија, и покрај континуираното одбивање на израелската влада да ги прифати американските апели за дипломатско решение на ситуацијата во Либан или Газа.
„Либан, регионот и светот се побезбедни без Насрала“, рече Блинкен на состанокот на Глобалната коалиција за поразување на ИСИС.
Блинкен ја повтори потребата од прекин на огнот на сината линија и во Газа, наведувајќи дека „дипломатијата останува најдобар и единствен пат за постигнување поголема стабилност на Блискиот Исток“. Тој додаде дека САД се посветени „веднаш да ги унапредат тие напори“.
Портпаролот на иранското Министерство за надворешни работи, Насер Канани, изјави дека Израел „нема да остане неказнет за злосторствата што ги направил“.
„Не даваме празни ветувања, на дело покажавме дека стоиме цврсто против агресорите кои имаат намера да ја поткопаат националната безбедност на Иран и тие ќе зажалат за нашиот одговор. Иран нема да остави без одговор ниту една агресивна акција на ционистичкиот режим, чија цел се иранските интереси.
„Овој режим нема да остане неказнет за злосторствата што ги изврши, а Иран ќе преземе соодветни мерки како одговор“, рече Канани.
