Најнова студија открива: Микропластиката влегува во човечките клетки по натопување на кесички чај во вода

Оние кои избегнуваат чај од филтер кесички можеби се во право, бидејќи научниците од Шпанија пронајдоа траги од микропластика што влегуваат во човечките клетки откако ќе ги натопат кесичките со чај во вода.

Истражувањето на тимот од Автономниот универзитет во Барселона (UAB), Универзитетот Сохаг во Египет и Центарот за истражување на животната средина Хелмхолц, објавено во списанието Chemosphere, покажа дека комерцијалните кесички чај на база на полимер можат „да ослободат милиони нанопластика и микропластика на натопување“, пренесува Хина.

Тимот вели дека нивната студија покажала дека огромен број честички на крајот се апсорбираат од цревните клетки, од каде преминуваат во крвотокот, а потоа низ човечкото тело.

„Експериментите кои се фокусираа на биолошките интеракции покажаа дека цревните клетки кои произведуваат слуз имаат највисоко навлегување на микро и нанопластика, со честички кои дури влегуваат во клеточното јадро, кое содржи генетски материјал“, објаснуваат истражувачите, нагласувајќи ја очигледната клучна улога што ја игра во цревата слуз при носење на пластиката подлабоко во човечкото тело.

„Потенцијалните здравствени импликации на еколошките микро/нанопластики (MNPLs) се сè позагрижувачки“, рече тимот во студијата, повикувајќи на „понатамошни истражувања за ефектите што хроничната изложеност може да ги има врз здравјето на луѓето“.

Истражувањето објавено минатата година покажа дека честички н а пластиката можат да навлезат во мозокот и тестисите, да се пренесат од бремена мајка на нејзиното неродено дете и да ја спречат ефективноста на антибиотиците.