Најмногу ги пцујат и колнат, ама џебот им е полн како брод

Евролигата постави јасна структура на плати за судиите, а според податоците на специјализираниот кошаркарски сајт „Баскетњуз“, судиите кога се на терен во најсилното европско натпреварување можат да заработат и до 5.000 евра по натпревар. Сепак, во споредба со НБА судиите, овие бројки изгледаат многу поскромни, бидејќи најискусните судии во САД заработуваат и до 29.000 долари по натпревар!

Судиите во Евролигата се рангирани во три категории, во зависност од фазата на натпреварување. Во текот на регуларниот дел од сезоната, судиите заработуваат по 2.000 евра по натпревар (пред оданочување). Во плејофот таа бројка се искачува на 3.000 евра, додека елитните осуммина, кои го судат Фајнл-форот, добиваат најмногу 5.000 евра по натпревар.

Покрај хонорарот, на судиите им се покриени и сите патни трошоци, вклучувајќи ги и авионските билети и сместувањето, што дополнително го олеснува нивниот ангажман низ Европа. Интересно е што Евролигата ангажира и резервни судии за завршницата, кои добиваат по 1.200 евра по натпревар, дури и да не добијат шанса да судат.

Како што објави специјализираната кошаркарска веб-страница „Баскетњуз“, во НБА судиите се плаќаат според искуството и рангирањето. Најмладите судии заработуваат околу 1.800 долари (1.730 евра) по натпревар, додека поискусните може да заработат и до 6.700 долари (6.450 евра) по натпревар. Кога ќе пристигне завршницата на сезоната, тие бројки стануваат уште поимпресивни. Според американските медиуми, најдобрите судии во големото финале можат да заработат дури 29.000 долари (27.900 евра) по натпревар!

За разлика од Евролигата и НБА, Лигата на шампионите на ФИБА функционира преку систем на годишни плати и бонуси по натпревар. Најдобрите 16 судии земаат годишна плата од 12.000 евра, плус 450 евра по натпревар. Други 16 судии добиваат 9.000 евра годишно со истиот хонорар по натпревар, додека 22 судии од најниската категорија немаат годишна плата, туку инкасираат 750 евра по натпревар.