Најдобрите тенисери им се заканија на челниците на Грен слемовите

Само неколку недели откако Асоцијацијата на тениски професионалци (ПТПА) ги тужеше водечките тениски органи (АТП, ВТА, ИТИА и ИТФ), се случи нов пресврт во „белиот спорт“.

ПТПА не ги тужеше Гренд Слемовите, но затоа најдобрите тенисери на планетата планираат потенцијално да го сторат тоа поради пари.

Според информациите на францускиот „Л’Екип“, 20-те најдобри тенисери испратиле молба до Австралија Опен, Ролан Гарос, Вимблдон и САД Опен, барајќи порамноправна распределба на парите.

Тие во писмото наведуваат дека лига како НБА дава минимум 50 отсто од приходите во текот на една сезона на играчите, додека во тенисот таа бројка е многу помала. На пример, вкупниот награден фонд на Ролан Гарос лани изнесуваше 53,4 милиони евра, односно само 16% од приходот на тој турнир (338 милиони).

Претходниот притисок од тенисерите вроди со плод, бидејќи 2022 година забележа значително зголемување на наградите, најмногу за победниците на грен слем (54%), полуфиналистите (60%) и победниците од првиот круг (40%).

Минатата година Ролан Гарос го зголеми наградниот фонд за 7,82 отсто во однос на 2023 година, а победниците во машка и женска конкуренција добија 2,4 милиони евра.

Кога ќе се соберат сите Грен слем турнири, во наградни фондови беа поделени вкупно 254 милиони евра, што е повеќе од 231 милион во однос на 2023 година, а овие пари ги собраа над 800 натпреварувачи во сите категории.

Сега се очекува реакцијата на организаторите на Грен слемовите, пред се на Ролан Гарос, кој започнува на крајот на мај, а кој на околу еден месец пред почетокот на турнирот ќе го објави наградниот фонд за оваа година.