На матичен лекар само со верифициран телефонски број

Прегледи, добивање упати, лекарски рецепти… кај матичните лекари од завчера се вршат само со ажурирани телефонски броеви на пациентите. По едномесечното одложување во сила стапи одлуката за ажурирањето на телефонските броеви на пациентите што ја донесе Управата за електронското здравство. Ова значи дека оние пациенти кои немаат заведено свој точен телефонски број ќе треба да го заведат за да не се соочат со проблемите во тековното лекување. Односно, матичните лекари нема да може да издаваат упати и рецепти доколку телефонскиот број не е ажуриран/

Фикрет Шабани, директор на Управата за електронско здравство, за весникот ВЕЧЕР изјави дека одлуката се применува без поголеми проблеми.

-Во најголем дел се врши ажурирањето но има и проблеми. Тие се врзуваат за тоа што и двете страни не се доволно едуцирани, што некои пациенти имаат стари модели на телефони и слично. Сепак, не значи дека некој нема да може да остане без лекувањето ако не му е ажуриран број. За нив и натаму ќе ја применуваме опцијата преку издавање на итни упати. Но, сепак, најдобро е за сите да се ажурира бројот. Ова е за доброто на сите, за подобро искористување на термините од „Мој термин“ – објаснува Шабани.

Претседателката на Здружението на приватни матични лекари, Лилија Чолакова Дервишова ни рече дека лекарите ја применуваат одлуката но работата им е забавена.

-Се трудиме иако се соочуваме со она на што предупредувавме дека лекарите наместо да му се посветат на пациентот ќе губат време на ажурирањето. Ни доаѓаат стари пациенти без телефони, кои не знаат како сами да го ажурираат бројот и ние мораме да им помогнеме. Тоа ни одзема драгоцено време и стануваме теелфонски оператори наместо лекари – укажа таа. (Б.Ѓ.)