Мал астероид ќе влезе во орбитата на Земјата на крајот на септември и ќе ја обиколи нашата планета помалку од два месеци, што значи дека, барем за кратко, ќе имаме два природни сателити.
Нашата идна мини-месечина е астероид по име 2024 PT5, кој беше откриен на 7 август од системот АТЛАС.
Објектот е на таква траекторија што привремено ќе биде „заробен“ во гравитацијата на Земјата од 29 септември до 25 ноември.
Според пресметките на Карлос и Раул де ла Фуенте Маркос, истражувачи од Универзитетот Комплутенсе во Мадрид, за тоа време ќе запише само еден круг околу нашата планета, пред да продолжи по својот пат.
Астероидот е во дијаметар само десет метри, па нема да биде видлив со голо око, пренесува USA Today.
Според трудот објавен од научниците во Истражувачките белешки на Американското астрономско друштво, ретко е нашата планета да има „две месечини“, но такви настани се случиле.
На пример, мини-месечина се најде во орбитата на Земјата во јули 2006 година и остана таму околу една година. Исто така, еден орбитираше околу нашата планета неколку години пред да успее да „избега“ од нејзината гравитација во мај 2020 година.
Истражувачите се сомневаат дека најновиот иден придружник на нашата планета потекнува од астероидниот појас познат како „Арџуна“.
