„Нѐ крадеа со децении“: Трамп најави реципрочни царини за земјите ширум светот, вклучително и ЕУ

Американскиот претседател Доналд Трамп најави обраќање до Америка и светот по повод „Денот на ослободувањето“. Тој рече дека ќе потпише извршна наредба за „реципрочни царини за земјите ширум светот“.

„Втори април 2025 година засекогаш ќе биде запаметен како денот кога се прероди американската индустрија. Со децении нашата земја беше ограбувана, уништувана, силувана и експлоатирана од блиски и далечни нации, сојузници и непријатели“, рече Трамп на почетокот на говорот.

Тој рече дека работните места и домашното производство „ќе се вратат“ во Америка и дека неговата политика ќе ги принуди другите пазари да се отворат за американските производи.

Тој најави засилена пазарна конкуренција и пониски цени за потрошувачите, што предизвика аплауз од толпата.

„Ова навистина ќе биде златното доба на Америка“, додаде претседателот.

Тој најави дека од полноќ САД ќе воведат царина од 25 отсто за сите автомобили произведени надвор од САД.

Коментирајќи го трговскиот дисбаланс, Трап рече дека понекогаш „пријателите се полоши од непријателите“ кога станува збор за трговијата.

„Повеќе од 80 отсто од автомобилите произведени во Јужна Кореја се продаваат во Јужна Кореја, а повеќе од 90 отсто од автомобилите што се продаваат во Јапонија се произведени во Јапонија“, рече тој.

Тој додаде дека автомобилите произведени во САД, како што е Форд, имаат само симболично присуство на тие пазари, што, според него, „ја опустоши американската автомобилска индустрија“.

„Затоа, почнувајќи од полноќ, ќе стапи на сила царината од 25 отсто за сите возила произведени во странство“, најави Трамп.

Трамп воведува царини од 20 отсто за увоз од ЕУ
На големиот графикон што Трамп го прикажа на прес-конференцијата, се наведува дека САД ќе воведат царини за Европската Унија од 20 отсто, за Велика Британија од 10 отсто, за Виетнам од 46 отсто, за Јапонија од 24 отсто, за Индија од 26 отсто, за Јужна Кореја од 25 отсто и за Тајланд од 36 отсто.

Тој изјави дека светските лидери кои сакаат ослободување од одмазднички царини треба да ги променат своите трговски политики.

Трамп рече дека работните места и фабриките ќе се вратат во САД.

„Нациите кои се однесуваа лошо со нас ќе мора да се справат со вкупните, вклучително и немонетарните бариери“, рече Трамп.