Може да го избере било кое име, но едно е строго забрането: Зошто новиот папа не смее да се вика Петар?

Папата Франциск почина на 21 април на 89-годишна возраст, а по неговата смрт Католичката црква влегува во нова фаза – избор на наследник.

Откако ќе биде избран новиот папа, ќе му биде понудено да го избере името што ќе го носи до крајот на неговиот понтификат. Меѓутоа, зошто папата не може да се вика Петар?

Името Петар било името на првиот папа – Свети Петар, кого католичката традиција го смета за апостол на Исус и прв поглавар на Црквата. Токму поради оваа исклучителна симболика и важност, името Петар носи посебно значење во историјата на папството. А како што пишува Индекс, еве неколку главни причини зошто новиот папа веројатно никогаш нема да се вика Петар Втори.

Свети Петар се смета за „карпа“ на која Христос ја изгради црквата. Преземањето на неговото име може да се толкува како обид да се изедначи со него или како присвојување на неговата посебна улога во историјата на Црквата. Сите претходни папи, повеќе од 260 од нив, го избегнаа името Петар токму поради тоа што има статус на единствено име. Свети Петар се смета за над сите други папи – сите се негови наследници.

Пророштва и легенди
Исто така, постојат некои црковни пророштва и легенди, како што се т.н. Пророштвата на Свети Малахија, кои велат дека папата по име Петар ќе биде последниот папа пред „крајот на светот“ или големи превирања. Иако Црквата не ги признава овие пророштва како официјални, тие дополнително придонесоа за „табуизирање“ на тоа име.

„Папите можат да изберат кое било име, но во последно време тие се претежно имиња на Исусовите апостоли“, објасни своевремено ватиканскиот експерт Бруно Бартолони. „Единственото име што тие никогаш не го избираат е Петар. Првенствено од почит кон Свети Петар, но и затоа што некои легенди велат дека папа по име Петар ќе биде последниот папа на Католичката црква.