Додека полицијата трага по напаѓачот кој го уби Брајан Томпсон, извршен директор на американската мултинационална компанија за здравствено осигурување и услуги UnitedHealthcare, среде Њујорк се појавија нови траги.
Томсон беше застрелан пред хотел на Менхетен во средата наутро пред почетокот на годишната конференција за инвеститори на неговата компанија.
На видеото се гледа како напаѓачот полека оди зад Томпсон и отвора оган пред хотелот Хилтон.
Како дел од истрагата, полицајците сега бараат индиции за движењето на осомничениот пред нападот и порака напишана на муницијата пронајдена на местото на настанот.
Сега се верува дека осомничениот можеби отпатувал во Њујорк кон крајот на минатиот месец со автобус од Атланта, објави NBC News, цитирајќи тројца високи претставници на органите на редот. Инспекторите работат за да видат дали можат да најдат име од билетот купен за патувањето на 24 ноември, што би можело да помогне да се идентификува осомничениот.
На сликите објавени од полицијата во четвртокот, осомничениот може да се види како се смешка во хостел на Апер Вест Сајд.
Полицијата истражува дали користел лажна лична карта за престој во хостелот и дали платил во готово. Беше претресена неговата соба во хостелот. Си-Ен-Ен објави дека сликата на осомничениот како се смее е добиена дури откако од него било побарано да ја спушти маската додека флертува со вработена во хостелот.
На сликата се гледа осомничениот без маска како флертува со жената која го пријавила во хостелот. За време на интеракцијата, жената го замолила да ја симне маската, што било фатено на камерата.
Осомничениот бил фотографиран и во Старбакс пред пукањето, каде купил шише вода и протеински плочки – кои подоцна биле пронајдени во корпа за отпадоци и однесени на ДНК-тестирање. Во средата наутро, напаѓачот се приближил до хотелот Хилтон, каде што Томпсон присуствувал на конференција и го застрелал во близина на зградата.
Полицијата соопшти дека напаѓачот продолжил да пука, а потоа побегнал во уличка, каде подоцна бил пронајден телефон поврзан со осомничениот. Истражителите веруваат дека напаѓачот користел специјален тип на пиштол кој не е лесно достапен на пазарот.
Тие ја истражуваат и можноста напаѓачот да го купил пиштолот во Конектикат.
На чаурите пронајдени на местото на настанот биле испишани зборовите „одбиј“, „одбрани“ и „отфрли“, велат полициски извори.
