Мицкоски и Филипче си подадоа рака, следен чекор е лидерска средба

Заеднички тела и работни групи ќе работат на спроведување на реформската агенда, договориле на денешната средба во Владата премиерот Христијан Мицкоски и лидерот на СДСМ, Венко Филипче. По средбата, Филипче изјави дека правосудството, енергетиката и стратегијата во здравството биле областите на кои ќе се фокусираат. Тој оцени дека има волја од двете страни. Уставните измени, исто така, биле на маса, но Филипче посочи дека на оваа тема имаат различни гледишта со премиерот.

 -Првичните закони кои треба да стигнат во Собранието, во делот на правосудтсвото, нешто што ги тангира сите граѓани, енергетиката, и некои работи во однос на стратешките движења и проекти во здравството. Ова е еден првичен состанок, ние сеуште треба да видиме каква ќе биде таа методологија, да ја разработиме, меѓутоа, морам да кажам дека има волја од двете страни, изјави Филипче по средбата.

Следна средба не договориле, но Филипче сега ќе номинира неколку експерти кои што ќе работат на изработката на законите кои се дел од реформската агенда од областа на правосудството и енергетиката, а треба да стигнат до Собрание. Ова, рече е меѓупартиска средба, а секако сите партии ќе бидат вклучени.

 -Ова е за доброто на државата, рече лидерот на СДСМ.

Ова беше прва средба помеѓу премиерот Христијан Мицкоски и лидерот на СДСМ, Венко Филипче, откако двајцата се на овие функции. Додека Мицкоски и Филипче изразија заемна подготвеност и волја за разговор, нивната средба наиде на критики кај повеќето од останатите парламентарни партии, особено од албанскиот политички блок, од каде што обвинија за „моноетничка коалиција“.

На оваа средба, како што претходно најави, Филипче на премиерот му го образложи планот за долгорочна стратегија на државата која би се изготвила со политички дијалог. Додека траеше средбата, Филипче на социјалните мрежи објави дека на средбата го презентира „концептот за нов општествен договор со кој конечно и трајно ќе ги решаваме проблемите со кои се соочува државата и граѓаните“.

Пред почетокот на состанокот, лидерот на СДСМ изјави дека очекува конструктивен разговор и оти е внимателен оптимист. Филипче демантираше дека овој состанок со Мицкоски има етничка димензија. Тој рече дека потребата за средби произлезе по трагедијата во Кочани и сите партии се поканети да присуствуваат на средбите во иднина.

– Повикот за меѓупартиска средба беше, сè уште е за сите партии со оглед на тоа што премиерот прв и веднаш прифати. Еве ќе поразговараме за темите коишто сметам дека заеднички треба да се изменаџираат, коишто никогаш досега не биле така менаџирани. Темите ги нафрлив вчера, денеска ќе се обидам подетално да му ги објаснам како и некои предлог начини, така како што ми е мене во моментот размислувањето без претензија дека тоа е вистинскиот начин. Секако дека отворен сум да разговараме за сите опции. Во однос на очекувањата еве како и секогаш да кажам дека сум внимателен оптимист. Сите се поканети, сите лидери треба да присуствуваат понатаму на следните состаноци бидејќи ова е за доброто на државата и на сите граѓани, изјави Филипче, непосредно пред почетокот на средбата.

Премиерот Христијан Мицкоски, пак, на социјалните мрежи објави фотографии од средбата со лидерот на СДСМ, Венко Филипче, уште додека средбата беше во тек.

-Средба каде што разговараме за актуелните случувања, и од која сакам да се знае дека одговорност, мудрост и чесност и се повеќе од потребни на Македонија!“, напиша Мицкоски.

Експресно договорена средба

По повикот од претседателот на СДСМ, Венко Филипче, за политички и општествен дијалог, премиерот и лидер на владејачката ВМРО-ДПМНЕ, Христијан Мицкоски, рече дека во секое време, дури и на полноќ е подготвен за средба со Филипче доколку навистина има план и желба да помогне, но предупреди дека нема да прифати „Стабри“ пристап.

– Јас во една моја изјава кажав дека ова е сериозна тема и за сериозна тема се седнува и се разговара. За мене е малку непристојно да разговараме преку медиуми, реков доколку има план како што најавија, подготвен сум да го примам на средба претседателот на СДСМ да го образложи планот, да го слушнеме планот бидејќи се сериозни времиња, јас сум сериозен човек, сериозни работи се во прашање и најмалку што треба да се прави е естрада на јавна сцена. Ако навистина има план и желба да помогне, стојам на располагање во секое време ќе го прераспределам мојот распоред, на полноќ – на полноќ, после полноќ, кога ќе каже, тогаш да го сослушам неговиот план и да видиме дали во тој план може нешто да се реши. Но, доколку планот опфаќа пристап „Стабри“, како што беше во минатото за време на короната тогаш такви планови не можам да прифатам, изјави Мицкоски.

Неколку часа подоцна, од Владата соопштија дека средбата е закажана, имајќи ја предвид меѓусебната подготвеност.

Претходно, во средата, лидерот на СДСМ, на прес-конференција предложи концепт за нов општествен и политички дијалог. Областите каде што треба системски пристап, според Филипче се – образование, здравство, правосудство, животна средина, партизација и политизација. Тој сметаше дека најпрво треба да оствари тет-а-тет средба со премиерот Христијан Мицкоски бидејќи, како што рече, тој прв подал рака и рекол дека средбата е прифатлива, а потоа да се реализира средба и со сите лидери на парламентарните партии.

-По големата трагедија во Кочани, ја видовме реакцијата на граѓаните, револт, на места и бес. Би рекол сосема оправдано, бидејќи тоа што во изминатите три децении, тоа што се нарекува реформи, тоа што се нарекува транзиција, очигледно не го даде посакуваниот резултат. Системот на многу места очигледно не функционира како што треба. Јавните сервиси немаат перформанс каков што граѓаните заслужуваат. За тоа вина имаме сите политички партии, СДСМ, ВМРО-ДПМНЕ, ДУИ, другите политички партии, рече Филипче и додаде дека немаме веќе деца да ги губиме со тоа што ќе одат во странство.

Лидерот на СДСМ смета дека во дијалогот треба да се вклучат сите политички партии и други чинители во општеството. Тоа што граѓаните најмногу ги иритира, вели Филипче, е партизацијата и политизацијата.

Партиски негодувања за средбата

Иницијативата на лидерот на СДСМ за средба со премиерот, а потоа и со лидерите на сите парламентарни партии, средби на кои ќе се формира концепт за нов општествен и политички дијалог во Македонија, не наиде на воодушевување во останатите партиски штабови.

Од ЗНАМ – За наша Македонија преку соопштение реагираа дека СДСМ и Венко Филипче немаат политички кредибилитет, ниту легитимитет да нудат какви било концепти за Македонија овој момент и дека тие не можат да бидат решение на проблемите, бидејќи покажале дека тие се проблем за секое решение. Прашуваат дали „самопрогласениот лидер на опозиција со ова бара начин да се факторизира како политички фактор во јавноста и да седне на преговарачка маса, имајќи ја предвид очајната состојба на неговата партија“?

-Довчерашниот министер во владите на Зоран Заев, одговорен за длабоките системски грешки во општеството, директно одговорен за трагедијата во Тетово со модуларната болница каде што загинаа 14 невини лица, криминалната набавка на вакцини во времето на ковид кризата, случајот во клиниката за Онкологија, каде што наместо хемотерапија на болните им се даваше физиолошки раствор, директното учество во донесувањето на измените на Кривичниот Законик, каде што се амнестираа функционерите од режимот на Груевски, но и високи функционери на СДСМ на чело со неговиот ментор Зоран Заев, денеска предлага КОНЦЕПТ за НОВ општествен дијалог во Македонија. Македонската јавност не е дементна за да заборави дека директорот на Фондацијата ЗАЕВ во претходните 8 години го промовираше концептот Едно општество за СИТЕ, едно за Вицето, велат од ЗНАМ.

Реакции за средбата Мицкоски-Филипче имаше и во албанскиот политички блок, од каде што обвинија за моноетничка коалиција. Од опозициската ДУИ изразија „силна загриженост поради сè понагласената моноетничка доминација која власта ја демонстрираше во првата година од своето владеење, а сега веќе на јавна сцена ја вклучува и етничката македонска опозиција во својата намера“.Тие сметаат дека основниот модел на мултиетничкиот карактер на земјата е системски загрозен, а загрозен е и интегративниот процес на земјата во ЕУ, а тоа се две клучни стратешки основи коишто сериозно ја загрозуваат долгорочната стабилност и просперитет на земјата, и тоа се двата приоритети за кои треба да се отвори суштински политички дијалог.

– Јавноста е просто згрозена од овој јавен флерт на Мицкоски и Филипче, за полноќни средби во политички интимна атмосфера на која ништо помалку туку ќе се крои планот за нов општествен договор за регулација на идните политички текови. Иако и досега не беа за ништо прашувани, дегутантен е молкот на албанскиот партнер во Владата, стои во соопштението од ДУИ.

Средбата меѓу првите луѓе на двете најголеми политички партии во земјава не наиде на одобрување и кај Алијанса на Албанците на Зијадин Села. Оттаму порачаа дека „оваа моноетничка средба е практична имплементација на платформата Македонија повторно твоја!“.

Ставот на целата коалиција „Вреди“ е дека Филипче нема кредибилитет да повикува на лидерска средба.

И дел од аналитичарите сметаат дека лидерска средба нема поента. Деновиве, политикологот Синиша Пекевски, за весникот ВЕЧЕР изјави дека не гледа причина за таква средба иницирана од СДСМ, кој не само што имал можност да воспостави нов систем и да спроведе правна држава во време на своето седумгодишно владеење, не само што не направил чекор напред, туку со своите постапки ја уназадил државата. (В.С.Н.)