Пред само неколку недели, поранешниот возач на Хас и син на легендарниот Михаел Шумахер, Мик, се чинеше дека ги загуби шансите за враќање во Формула 1, бидејќи изгледаше дека Заубер (Ауди) ќе го продолжи договорот со Валтери Ботас.
Сепак, Матиjа Биното, новиот шеф на тимот, откри дека сè уште не донел конечна одлука и дека Мик би можел да се врати во Формула 1.
- Можеме да си го дозволиме луксузот да одвоиме време бидејќи сите други тимови веќе имаат свои возачки состави, изјави Биното за италијански „Кориере дела сера“.
Според него, постојат две клучни опции: од една страна, искуство кое може да му помогне на тимот да оди напред, а од друга страна, млади таленти кои би можеле да ги придружуваат на нивниот пат кон врвот.
Биното, кој претходно беше шеф на Ферари, веќе добро го познава Мик Шумахер од неговото време како дел од развојната програма на Ферари.
- Дефинитивно го разгледуваме тоа. Го запознав и разговарав со него. Го познавам долго време бидејќи беше дел од академијата на Ферари. Ги знам неговите силни страни, потврди Биното.
Шумахер, кој има 25 години, е еден од кандидатите кои Ауди ги има на ум за иднината на тимот.
Сепак, Биното предупреди дека тој за успех можеби ќе треба да почека до 2030 година, бидејќи тимот моментално претрпува сериозни промени.
Заубер, кој е последен на листата на конструктори во 2024 година, сè уште нема освоено ниту еден бод во сезоната.
- Разликата со Ферари, на пример, е огромна, од инфраструктура до луѓе и ресурси, истакна Биното.
Иако Заубер е амбициозен во своите планови за иднината на Формула 1, реалноста е дека ќе поминат неколку години пред тимот евентуално да биде на врвот.
