Во Солун официјално е регистриран првиот случај на респираторниот вирус ХМПВ, чие ширење предизвика паника за нова здравствена криза, слична на коронавирусот.
Заболен бил 71-годишен маж чија ќерка за време на празниците била во Кина, и неколку дена по враќањето нејзиниот татко ги покажал првите симптоми. Тој е на лекување во болницата „Папаниколау“.
Во саботата му бил направен ПЦР тест, и во понеделникот резултатите покажале дека е позитивен на ХМПВ вирусот.
Дотогаш мажот лежел на Клиника за пневматологија, но веднаш потоа бил ставен во изолација.
Хуман метапневмовирус (ХМПВ) е респираторен вирус кој предизвикува симптоми слични на оние на обичната настинка и грип. Вирусот не е нов, но го предизвика интересот на властите поради порастот на случаите, особено кај децата помали од 14 години во Северна Кина.
