Меншик не му дозволи на Ѓоковиќ да ја освои стотата титула

Чешкиот тенисер Јакуб Меншик (19) направи сензација на мастерсот во Мајами откако во финалето го победи Новак Ѓоковиќ, во два сета со 7:6, 7:6), со што го спречи најголемиот светски тенисер да дојде до посакуваниот стоти трофеј во кариерата.

Српскиот ас пред овој меч се најде во големи проблеми затоа што долго чекаше да игра, а исто така имаше и проблеми со окото во кое ставаше капки затоа што се појави оток заради засега непозната причина. Меншик имаше феноменална контрола на играта против ривалот кој му е идол, па може да се каже дека ученикот го победи учителот.

Чехот ги искористи сите слабости на Ѓоковиќ, тргна фуриозно и поведе со 4:1 во првиот сет, но Ноле се врати, дојде до тај-брејк, во кој загуби здив заради лошо отворање и негатива од пет поени. Вреди да се напомене дека во првиот сет Ѓоковиќ имаше и еден незгоден пад при кој не се повреди сериозно за влакно.

Во вториот сет се играше гем за гем, Меншик и Ѓоковиќ имаа сигурни сервиси, а само двапати младиот Меншик имаше шанса да направи брејк, ама не успеа. Така и овој сет замина до тај-брејк, во кој Меншик отвори подобро, направи брејк потоа за 5:3 и така го совлада најголемото тениско име откако ја искористи втората меч топка.

„Честитки за Меншик и неговиот тим. Никогаш не сум среќен кога губам. Но, го следев кога имаше 15 или 16 години и му се јавив, имавме добри тренинзи заедно. Тренираше и во мојот клуб во Белград, беше прекрасно да го гледам како се развива и пред неколку години. Навистина ми е драго што го искористи својот потенцијал, изајви по мечот Србинот

Новак ќе мора да го бара патот до својата 100-та титула во сезоната на земјени терени што следи по американската турнеја. Првиот турнир на кој ќе учествува е Мастерсот во Монте Карло. Ноле покрај бодовите доби и сериозна финансиска награда. Вицешампионот на Мастерсот во Мајами има повеќе од половина милион евра – точно 547.443 евра. Неговиот ривал Јакуб Меншик, пак заработи многу повеќе – 1.029.511 евра.