Италијанската адвокатка и политичарка Марија Елена Боски (44) е едно од најпознатите лица во италијанската политика. Таа е позната по соработката со поранешниот премиер Матео Ренци, но и по приватниот живот кој привлекува големо внимание. Родена е на 24 јануари 1981 година во Монтеварчи, Тоскана, и пораснала во семејство од средна класа. Нејзиниот татко Пјерлуиџи Боски бил банкар, а нејзината мајка Стефанија Агрести била учителка и поранешен заменик градоначалник.
Откако Марија Елена Боски дипломирала право на Универзитетот во Фиренца, нејзиното политичко патување започна во 2008 година, кога станала соработник на тогашниот градоначалник на Фиренца, Матео Ренци.
Иако првично не беше препознаена како клучна политичка фигура, таа брзо стекна доверба и стана една од најблиските соработници на Ренци.
Во 2013 година беше избрана во Домот на пратеници на италијанскиот парламент, а од 2014 до 2016 година беше министерка за парламентарни односи и уставни реформи во владата на Ренци.
Нејзината работа на политичките реформи ја направи препознатлива и меѓу странските медиуми.
По промените во италијанската политика и оставката на Ренци, Боски ја продолжи кариерата како државен секретар во Кабинетот на премиерот во времето на Паоло Џентилони.
Во 2019 година, таа одлучи да ја напушти Демократската партија и да се приклучи на новата политичка партија Италија Вива, основана од Ренци.
Иако е политичарка која првенствено се истакнала преку својата работа, и приватниот живот на Марија Елена е тема на медиумите.
Од 2020 година, Боски е во врска со италијанскиот актер Џулио Беррути (40). Иако доаѓаат од различни светови – политика и филм – нивната врска стана многу јавна.
