Манчестер Сити може „да бира“, Реал (М) или Баерн (М)

Со натпреварите од 8. коло беше комплетирано првото издание од реформираната групна фаза во најпрестижното клупско натпреварување, Лигата на шампиони. Првпат нема клубови кои ќе ја заменат ЛШ со Лига Европа, бидејќи екипите од 25. до 36. место ја завршуваат европската авантура. Меѓу нив ќе го нема Динамо од Загреб, чии дрес го носат македонските интернационалци, Стефан Ристовски и Аријан Адеми, како и шпанската Џирона за која настапува Бојан Миовски.

Првите осум клуба, кои директно одат во осминафиналето без да одиграат дополнително коло од натпреварувањето, се Ливерпул, Барселона, Арсенал, Интер, Атлетико (М), Баер Леверкузен, Лил и Астон Вила. Аталанта, Борусија Д., Реал (М), Баерн (М), Милан, ПСВ, ПСЖ, Бенфика, Монако, Брест, Феенорд, Јувентус, Селтик, Манчестер Сити, Спортинг и Клуб Бриж се на позициите меѓу деветтото и 24. место.

Денеска со почеток во 12 часот во Нион ќе се одржи ждрепката за плејофот од ЛШ. Носители ќе бидат екипите пласирани од деветтото до 16. место, а противници ќе бидат клубовите пласирани од 17. до 24. позиција. Носителите реванш натпреварот ќе го играат на домашен терен.

Секој клуб има два можни противници. На пример, деветтопласираната Аталанта може да игра против 23. Спортинг или 24. Клуб Бриж, а 10. Борусија Дортмунд има исти потенцијални противници. Реал (М), кој заврши на 11-то место, и Баерн (М), кој беше 12-ти, можат да играат или со Селтик, кој заврши на 21-то место, или со Манчестер Сити, кој ја заврши групната фаза на 22-то место. Така во плејоф рундата сигурно ќе има барем еден „блокбастер“ дуел.

Дури откако ќе се одиграат осминафиналните натпревари, на 21 февруари, ќе се знае кој од осумте најдобри ќе оди на која страна од ждрепката и кои ќе му бидат можни противници во осминафиналето. Тогаш ќе биде познат целиот костур од нокаут фазата од Лигата на шампионите до финалето.

Натпреварите од плеј-офот, односно осминафиналето ќе се играат на 11 и 12 февруари, односно на 18 и 19 февруари. Натпреварите од осминафиналето се закажани за 4 и 5 март, односно 11 и 12 март.