Макс Верстапен доби понуда што не се одбива

Поранешниот Ф1-возач, Хуан Пабло Монтоја, предвидува дека Макс Верстапен ќе добие понуда што не ќе може да ја одбие: да му се придружи на Астон Мартин во блиска иднина.

Верстапен има договор со Ред бул до крајот на 2028 година, но во последните 12 месеци постојано се зборува за можно предвремено заминување, особено по шпекулациите за излезна клаузула.

Минатата година се појавија извештаи дека Астон Мартин размислува за понуда од една милијарда долари за Верстапен од Ред бул, тврдење што тимот од Силверстон го негираше.

Меѓутоа, со оглед на тоа што легендарниот дизајнер и технички гениј на Ред бул, Адријан Њуи, сега е дел од Астон Мартин, Монтоја верува дека тоа би можело да биде следната дестинација на Верстапен.

• Мислам дека Макс ќе добие понуда од Астон Мартин што не ќе може да ја одбие. Можеби, ќе му дадат уште една шанса на Ред бул, можеби една година, и ќе му дадат шанса на Адријан да почне да ги средува работите. Адријан не може да го направи тоа веднаш, тоа е сосема нова група и сите треба да научат да работат заедно. Дали ќе бидат подобри од сега? Секако. Но, не мислам дека веднаш ќе победуваат на трките – изјави Монтоја за „Vision4Sport“.

Сезоната 2026 носи нови технички прописи, кои може сериозно да го променат односот на силите во Формула 1. Монтоја предвидува дека Верстапен ќе донесе одлука за својата иднина по првите три трки од сезоната.

• Доколку Ред бул има проблеми во првата година, не би бил изненаден доколку, на третата трка, Макс потпише за некој друг тим. Да сум на негово место, би одел во Астон Мартин. Мерцедес би бил интересен, но Астон е логичен избор – тој ги има Адријан и Хонда – порача Монтоја.