Макрон за прв пат ја коментираше пресудата за Ле Пен: „Законот е ист за сите“

Францускиот претседател Емануел Макрон во средата за прв пат ја коментираше пресудата против екстремно десничарската политичарка Марин Ле Пен со која беше прогласена за виновна за проневера и забрана за учество на претстојните претседателски избори во земјата.

Макрон го отвори неделниот состанок на француските министри со свој коментар за одлуката на судот, потсетувајќи на „три работи“: „Дека судството е независно“; „Дека заканите кон судиите се апсолутно неподносливи и неприфатливи“; и дека „законот е ист за сите“.

Тој исто така изјави дека „сите обвинети имаат право на жалба“, рече владината портпаролка Софи Примас.

Во понеделникот тричлениот судски совет заклучи дека Ле Пен е виновна за проневера на пари од Европскиот парламент и ја осуди на четири години затвор – од кои две се условни, а другите две ќе бидат издржани во домашен притвор – а дополнително ќе треба да плати 100.000 евра. Со судската одлука и се забрани да извршува јавна функција во следните пет години.

Со оваа одлука Ле Пен е спречена да се кандидира за претстојните претседателски избори во Франција во 2027 година, доколку Aпелациониот суд не ја поништи одлуката. Апелациониот суд во Париз во вторникот издаде соопштение во кое укажува дека ќе ја разгледа жалбата на Ле Пен и ќе донесе одлука пред летото 2026 година.

Сојузниците на Ле Пен во земјата и странство веднаш ја осудија одлуката за забрана на нејзината кандидатура. Некои сметаат дека одлуката е антидемократска, иако многумина во своите говори погрешно го претставија она што се случи за време на судењето.

Иако мал број политичари ја доведоа во прашање вината на Ле Пен, некои од нејзините противници јавно се запрашаа дали судовите треба да воведат забрана за кандидатура во првостепените пресуди наместо во правосилните, наведува политичкиот магазин „Политико“ и додава дека во Франција повеќето казни се зголемуваат за време на жалбената постапка.