Македонија со гостиварката Тамара Грујовска го освои третото место на „Сан Ремо-Јуниор 2025“

Успех за восхит!

Нашата поп-ѕвезда Андријана Јаневска на Тамара ѝ е воедно и професорка, а која е восхитена со причина, порачувајќи дека Македонија се гордее со „малата“ Грујовска

Кога пред неколку дена пишувавме за талентираната гостиварка, 14-годишната пејачка Тамара Грујовска, дека на славниот фестивал „Сан Ремо-Јуниор“ ќе је претставува Македонија и дека има големи шанси да освои некоја позначајна награда, бевме стопроцентно во право дека нашите прогнози ќе се остварат. Тоа навистина се случи. Тамара од Италија се врати во Македонија со прекрасни вести. Третопласирана е на фестивалот кој има и поголема популарност и гледаност од Евровизискиот!

Таков успех ја поттикна нејзината горда професорка, нашата омилена поп-пејачка Андријана Јаневска восхитено да изјави за својата ученичка:

„Имаше над илјада пријавени кандидати, а Тамара се пласираше во Големото финале каде што по изведбата во живо со оркестар, во конкуренција од 25 финалисти, го освои високото трето место. Честитки за извонредниот успех. Македонија се гордее со тебе, Тамара!“

Инаку, самиот Фестивал се одржа на истата сцена на која пееја и возрасните легендарни пејачи, од Тото Котуњо, Клаудио Вила, преку Серѓо Ендриго, Милва, Ана Окса, па сè до италијанските претставници на Песна на Евровизија. Освен Македонија на овогодишниот „Сан Ремо-Јуниор“ се натпреваруваа и: Белорусија, Франција, Јужна Африка, Црна Гора, Молдавија, Индонезија, Казахстан, Бугарија, Австралија, Италија, Украина, Бразил, Германија, Аргентина, Азербеџан, Финска, Узбекистан, Индија, Австрија, Романија, Русија, Тајланд, Ерменија и Малезија.  (Д.М.)