Македонија мора да го реши ѓубрето – проблемите ќе се таложат, здравствените и еколошки трошоци ќе растат

Македонија се дави во ѓубре. Секојдневно се зголемуваат купиштата отпад кој се фрла на нестандардните депонии. Тие се палат, загадуваат и предизвикуваат еколошки и здравствени проблеми. Ова беше посочено на денешната партнерската конференција за одржливо управување со отпад, насловена како „Преобмислување на отпадот – од предизвици до одржливи решенија“ што се одржа во Скопје од каде што беше упатен апел дека треба да се најдат одржливи решенија за справување со овој проблем

Македонија се дави во ѓубре. Секојдневно се зголемуваат купиштата отпад кој се фрла на нестандардните депонии. Тие се палат, загадуваат и предизвикуваат еколошки и здравствени проблеми. На вчерашната партнерската конференција за одржливо управување со отпад, насловена како „Преобмислување на отпадот – од предизвици до одржливи решенија“, што се одржа во Скопје беше упатен апел што поскоро да се најдат одржливи решенија за справување со овој проблем кој ќе го зголеми загадувањето и ќе продолжи да предизвикува здравствените проблеми кај луѓето, а финансиски и еколошки трошоци на државата.

– За успешно справување со овие предизвици, неопходна е силна координација помеѓу националните и локалните власти, бизнис-секторот и граѓаните. Само со стратешки пристап и конкретни реформи, земјата може да се движи кон почиста и поздрава иднина – посочија од организацијата.

Како пример за проблемот со отпадот, градоначалникот на Општина Новаци, Стевче Стевановски, ја посочи депонијата во Мегленци каде што се депонира отпад од неколку општини.

– Ѓубриштето е нестандардизирано и нерегулирано, не се знае ни што се одлага, ни што се носи. Битолчани протестираат можеби со право зашто овој центар е во близина на градот, на околу 15 километри, но главната причина е можеби тоа што недоволно ги информиравме за тоа како ќе изгледа овој центар за управување со отпад. Можеби во иднина ќе треба да се позанимаваме во таа насока, да направиме медиумска кампања, да го доближиме тоа до луѓето, како ќе изгледа целиот проект. Се работи за сериозен проект и ако сите сериозно се зафатиме со него, се надевам ќе направиме нешто добро – потенцира Стевановски.

Тој смета дека неинформираноста на граѓаните е клучниот проблем и причина зошто тие реагираат и се против воспоставување регионален центар за управување со отпад во близина на Битола.

– Ќе мора да се спроведе кампања која ќе го објасни и доближи проектот до граѓаните. Планирано е со ова да се позанимаваат и експерти, домашни и од странство – истакна Стевановски.

Тој како пример ја посочи Грција каде, како што рече има депонија во близина на два големи града и опслужува речиси ист број жители како во регионот на Битола и Новаци.

– Проектот се заговара од 2009 – 2010 година, а се развлекува зашто има големи неверувања и несигурност кај луѓето во реализацијата. Предвиден е центар за управување со отпадот, односно фабрика која ќе го управува отпадот на правилен начин како во сите западни земји. Мислам дека многу скоро луѓе кои се стручни директно на граѓаните ќе им го доловат решението кое ќе значи бенефит за целиот регион. Едно од ветувањата беше и дека ќе се направи обиколница, патна делница што ќе води до центарот за управување со отпад. Се надевам дека ова ќе ги смири граѓаните зашто сепак не се работи само за Битола која сега одлага отпад на територијата на Новаци што малку е апсурдно – подвлече Стевановски.

Пред зградата на општина Битола минатата недела се одржа втор протест против изградба на регионална депонија.

Конференцијата се фокусираше на повеќе прашања врзани со итноста од подобрувањето на системот за управување со отпад во Македонија кој се наоѓа пред сериозен предизвик, за што е потребна промена на пристапот.

Регионалниот систем за управување со отпад предвидува меѓу другото затворање на нелегалните депонии, изградба на модерни регионални депонии и развој на инфраструктура за рециклирање, што ќе ја приближи земјата кон еколошките стандарди на ЕУ. Подобреното управување со отпадот не само што ќе го намали загадувањето, туку и ќе го подобри квалитетот на живот и ќе ја зајакне довербата во локалните власти.