Американскиот хокеар Мет Петгрејв повторно е ослободен со кауција до мај, откако беше уапсен под сомнение за убиство од небрежност при смртта на Адам Џонсон, пишува „Њујорк Тајмс“.
Хокеарот на Нотингем Пантерс, Адам Џонсон (29), почина откако лизгалката му го пресече вратот за време на натпреварот од англискиот Челинџ куп против Шефилд Стилерс на 28 октомври 2023 година. Неговиот клуб го опиша инцидентот како „бизарна несреќа“.
Во неортодоксната одлука која покренува прашања за одговорноста на играчите во вакви спортски несреќи, Петгрејв беше уапсен под сомнение за убиство од небрежност во ноември 2023 година.
Истрагата за околностите на смртта на Џонсон се уште е во тек. Полицијата во Јужен Јоркшир излезе со свое соопштение.
- Секоја дополнителна вест или развој на оваа истрага пред истекот на новата кауција ќе биде проактивно објавена на нашата веб-страница. Нашите мисли остануваат со семејството и пријателите на Адам, се вели во соопштението.
Иако британската полиција никогаш официјално не го именувала Петгрејв, во декември беше отворена сметка за групно финансирање, наводно во негово име, за да му помогне во борбата против обвиненијата за убиство од небрежност. На Петгрејв му е наредено да остане во Обединетото Кралство додека трае истрагата. Оттогаш, неговата кауција беше продолжена осум пати – на 9 февруари, 25 април, 14 мај, 26 јуни, 2 септември, 11 ноември, 20 јануари и неодамна на 28 февруари.
Пораката објавена на сметка за која се тврди дека е негова на CrowdJustice – онлајн платформа каде што поединци или групи можат да бараат пари за финансирање на правните постапки – гласи: „Барам помош за покривање на дел од моите правни трошоци додека сум на полициска кауција, како и дополнителни трошоци ако предметот оди до кривичниот суд. Сите преостанати средства ќе бидат донирани на иницијативи кои промовираат безбедност во хокејот“.
Во пораката се наведува и дека Петгрејв не може да работи во Обединетото Кралство додека ја чека разврската на полициската истрага. Страницата CrowdJustice се користи за собирање средства за правна помош.
