Лавров: Подготвени сме за договор

Русија е подготвена за договор за решавање на ситуацијата во Украина, но постојат одредени елементи што треба да се финализираат, изјави министерот за надворешни работи Сергеј Лавров во интервју за „CBS News“.

„Американскиот претседател верува, и мислам со право, дека се движиме во вистинската насока. Во изјавата на претседателот се споменува договор и ние сме подготвени да постигнеме договор. Но, постојат одредени точки и елементи што треба да се дотераат. Ние сме вклучени во овој процес“, рече дипломатот.

Тој, исто така, изјави дека Доналд Трамп е веројатно единствениот лидер во светот кој ја разбира потребата од решавање на основните причини за украинската криза. Тој, исто така, ги отфрли обвинувањата за напади врз цивилни цели во Украина.

„Ние ги таргетираме само воените објекти. Или цивилните објекти што ги користи армијата. Доколку целите ги користела украинската армија, Министерството за одбрана, командата на терен имаат право да ги нападнат“, заклучи Лавров.

Преговорите меѓу американската, европската и украинската делегација за решавање на конфликтот требаше да се одржат во Лондон во среда.

Според „Вашингтон пост“, САД имале намера да им понудат на европските земји и на Украина да го признаат Крим како руски, а сојузниците се надевале дека за возврат ќе добијат безбедносни гаранции за Киев.

Како резултат на тоа, американскиот државен секретар Марко Рубио и специјалниот претставник на Трамп, Стив Виткоф, ја откажаа посетата, а потоа и министрите за надворешни работи на Велика Британија, Франција и Германија одбија да учествуваат на состанокот, кој се одржа на пониско ниво.

Како што напиша „Вашингтон пост“, прекинот во преговорите бил предизвикан од гневот на Вашингтон поради фактот што Киев не сака да прифати предлози за отстапување територии, туку претпочита прво да разговара за целосен прекин на огнот, а потоа за сè друго.